Joriy yilda yoqilg‘i narxining keskin oshishi tufayli elektromobilga egalik qilish va undan foydalanish xarajatlari benzin yoki dizelli avtomobilniki bilan tenglashdi, ayrim hollarda esa pastroq ham bo‘ldi. Bu haqda LeasePlan lizing kompaniyasiga tayanib Financial Times xabar bermoqda.
LeasePlan lizing parki dunyoning 22 mamlakatida 1,9 millionga yaqin avtomobillarni o‘z ichiga oladi. Mutaxassislar o‘z avtomobillarining ekspluatatsiya xarajatlari va ijara narxlarini turli segmentlar bo‘yicha taqqoslab ko‘rdi.
Kompaniya ma’lumotlariga ko‘ra, elektromobil an’anaviy avtomobillardan qimmatroq bo‘lishiga qaramay, texnik xizmat ko‘rsatish xarajatlari va arzon yonilg‘i tufayli unga xizmat ko‘rsatish xarajatlari bir necha barobar past.
Hisob-kitoblariga ko‘ra, Yevropaning 22 davlatidan 19 tasida, jumladan, Buyuk Britaniya, Fransiya, Germaniya va Gollandiyada elektromobil va avtomobil xarajatlari teng yoki arzonroq. Faqat Polsha, Italiya va Chexiyada elektromobil sezilarli darajada qimmatroq bo‘lib chiqdi.
Energiya narxlaridagi inflyatsiyaga qaramay, elektromobillar uchun yoqilg‘i narxi benzin va dizel yoqilg‘isiga qaraganda sezilarli darajada pastligicha qolmoqda, — deya xulosa qildi ekspertlar.
COVID-19 pandemiyasi va ta’minot zanjiri bilan bog‘liq muammolar boshlanganidan beri ko‘plab avtomobilsozlik kompaniyalari yarim o‘tkazgich tanqisligi va yuk tashish narxining oshishiga duch keldi. Bu esa ba’zi zavodlarni ishlab chiqarishni qisqartirishga yoki faoliyatini yakunlashga majbur qildi.
2022-yildan keyin bu muammo rekord darajadagi issiqlik va Rossiyaning Ukrainadagi urushi tufayli energiya narxining oshishi bilan yanada kuchaydi.
Shunday qilib, 2020-yil oxirida ichki yonuv dvigatelli yangi avtomobillarning global sotuvi 14 foizga qisqarib, bor-yo‘g‘i 66,5 million donani tashkil etdi. Bu so‘nggi o‘n yillikdagi eng past ko‘rsatkichdir.
Shu bilan birga, elektromobillar va gibrid avtomobillarga talab 39-43 foizga oshdi. Aksariyat elektr transport vositalari Yevropa, Xitoy va AQSHda sotilgan.
Mavzuga doir:
Izoh (0)