Serbiya va qisman tan olingan Kosovo avtomobil raqamlari bo‘yicha kelishuvga erishdi va shu tariqa, nizoning yanada kuchayib ketishiga yo‘l qo‘ymadi. Bu haqda Yevroittifoqning tashqi ishlar va xavfsizlik siyosati bo‘yicha oliy vakili Jozep Borrel ma’lum qildi.
Kelishuvlar doirasida Serbiya Kosovo shaharlari kodlaridan iborat raqam belgilarini berishni to‘xtatadi, Kosovo esa serb raqamlariga ega transport vositalarini qaytadan ro‘yxatdan o‘tkazishni bas qiladi.
“Mamnuniyat bilan e‘lon qilamanki, Kosovo va Serbiyaning bosh muzokarachilari Yevroittifoq ko‘magida keskinlikning yanada kuchayib ketishiga yo‘l qo‘ymaslik imkonini beruvchi chora-tadbirlar haqida va ularning aloqalarini yaxshilash haqidagi takliflarga bor e’tiborini qaratishga kelishib oldi”, — deb yozdi Borrel Twitter’da.
1-noyabrdan boshlab Kosovo hukumati mintaqa hududidagi mashinalar serb raqamlari bilan emas, balki mahalliy raqamlar bilan harakatlanishini talab qilmoqda. 21-noyabrdan Serbiya raqamlariga ega bo‘lgan qonunbuzarlarni 150 yevroga jarimaga tortish ko‘zda tutilgan edi.
Avtomobil raqamlari atrofidagi ziddiyat bir yarim yildan buyon — Kosovo hukumati raqamlarni almashtirish rejalari haqida birinchi marta e’lon qilganidan keyin davom etmoqda. Eng keskin vaziyat 2021-yil sentabrida, Kosovoda istiqomat qiluvchi serblar norozilik belgisi sifatida ko‘chalarda barrikadalar qurib, Kosovo hukumati esa namoyishchilarni kuch bilan tarqatib yuborish bilan qo‘rqitganida, yuzaga kelgan edi. Nizoni tartibga solish uchun vaziyatga Yevroittifoq va NATO aralashishiga to‘g‘ri keldi. O‘shandan buyon tomonlar kelishib olishga urinayotgan edi.
Eslatib o‘tamiz, Serbiya va Kosovo o‘rtasidagi taranglik avgust oyi boshida yana kuchaydi. Vuchich Kosovo politsiyasi yarim tunda respublikadagi serblarga qarshi harbiy operatsiya boshlaganini da’vo qildi. 1-avgustdan boshlab Serbiya hujjatlari Kosovoda o‘z kuchini yo‘qotishi kerak edi.
Bir muncha vaqt o‘tgach, Kosovo respublikasining asosan, serblar yashaydigan shimoliy hududlarida havo hujumi sirenalari ishga tushirilgani va aholi barrikadalar qura boshlagani haqida ma’lumot paydo bo‘ldi. Keyinchalik Kosovo hukumati Yevropa Ittifoqi va AQSH elchilari bilan maslahatlashganidan so‘ng Serbiya hujjatlariga taqiq qo‘yish tartibini 1-sentabrga qoldirdi.
Ma’lumot uchun, Kosovo 2008-yilda Serbiya tarkibidan chiqib, o‘z mustaqilligini e’lon qilgan. Serbiya haligacha respublika mustaqilligini tan olmaydi. Kosovoni 116 davlat, jumladan AQSH va Yevropa Ittifoqining aksariyat davlatlari tan olgan.
Izoh (0)