Қисман тан олинган Косово республикаси 15 декабрь куни Евроиттифоққа қўшилиш учун ариза бермоқчи. Бу ҳақда Радио Телевисион оф Косово маҳаллий телеканали тегишли ҳужжат билан танишиб чиқиб, хабар берди.
Телеканал хабарига кўра, ариза 2022 йил ноябрида ёзилган. Унда таъкидланишича, Евроиттифоққа аъзо бўлиш Косово учун стратегик мақсад ҳисобланади ва буни мамлакат аҳолисининг 90 фоиздан ортиғи қўллаб-қувватлайди.
«Бу қадам фуқароларимизнинг кучли иродасини намойиш қилади ва Косово институтлари Евроатлантика йўлига қатъий содиқлигини яққол кўрсатади», — дейилади ҳужжатда.
RTК қайд этишича, Косовонинг Евроиттифоққа қўшилиш истиқболлари ноаниқ бўлиб қолмоқда, чунки бешта мамлакат, яъни Испания, Кипр, Греция, Словакия ва Руминия мамлакат мустақиллигини тан олганича йўқ. Шунга қарамай, Косово ҳукумати аминки, мамлакат 2015 йил 27 октябрдаги Барқарорлашиш ва уюшиш ҳақидаги битимда кўзда тутилган мажбуриятларини бажарган, шу сабабли Косово ва Евроиттифоқнинг яқинлашуви бўйича кейинги қадамларни Евроиттифоқнинг ўзи белгилаши керак.
Аввалроқ Косовонинг Евроиттифоққа кириш учун ариза бериш нияти ҳақида мамлакат бош вазирининг биринчи ўринбосари, Европа билан интеграциялашув учун жавобгар бўлган Бесник Бислими маълум қилган эди. Унинг сўзларига кўра, Косово 2030 йилгача Евроиттифоққа қўшилиши мумкин. Шунингдек, унинг қўшимча қилишича, бу пайтгача Косово унинг мустақиллигини тан олишдан бош тортган мамлакатлар билан барча баҳсларни ҳал қилишга эришади.
2003 йилда Евроиттифоқ Ғарбий Болқон мамлакатларига ЕИга аъзоликни таклиф қилиб, бунинг эвазига ушбу мамлакатларда Европа меъёрлари бўйича сиёсий ва иқтисодий ислоҳотлар ўтказилишини талаб этишга қарор қилган эди. Ушбу мамлакатлар орасида Иттифоққа аъзо бўла олган биринчи ва ҳозирча ягонаси Хорватия бўлди, у 2013 йилда қабул қилинган эди.
Косово эса Ғарбий Болқон давлатлари ичида Евроиттифоққа кириш учун ариза бермаган сўнгги мамлакат бўлиб қолмоқда.
Косово Барқарорлашиш ва уюшиш ҳақидаги битимга мувофиқ, Евроиттифоқда амал қилувчи стадартлар ва ҳуқуқий меъёрларга мувофиқ ислоҳотлар ўтказиш мажбуриятини олган эди.
Изоҳ (0)