Maxsus reportaj: Biz qishin-yozin ko‘chada ko‘radigan kasb egalari

Ko‘chada qorning muzlagan yo‘laklari va “sovuq havoli” qish quyoshi …Odamlar o‘qishga, ishga har doimgidan ko‘proq shoshiladilar, izg‘irindan pana bo‘lishga harakat qiladi.Ular shoshib o‘tayotgan katta-kichik yo‘llarning xavfsizligi, toza va qulayligi, manziliga eltayotgan ulovlarning mas’uliyati esa bizning bugungi qahramonlarimiz qo‘lida!

Umumiy maydoni 510 mln km kvadrat bo‘lgan yer sharida yashaydigan millionlab odamlar, turli mehnat faoliyatlari bilan mashg‘ul, o‘z kasblariga ega.

Va bu kasblar alohida yo‘nalishlar orqali, ma’lum jamiyat hamda davlatning muvaffaqiyatli qurilishi uchun xizmat qiladi.

Bugun “Daryo” jamoasi ana shu kasb egalarining o‘z manziliga eson-omon yetishi uchun, to‘rt fasl ko‘chada turib xizmat qiladigan insonlarning faoliyati bilan tanishdi.

Avvaliga biz faoliyati davomida kun va tun almashib ishlaydigan yo‘l patrul xizmati xodimi hikoyasiga qiziqdik.

Ish vaqtimiz tonggi 00:07 dan boshlanadi. Ertalabdan chiqib qiladigan ishimiz yo‘l harakati xavfsizligini ta’minlash.

Yog‘ingarchilik paytlari yo‘l-transport hodisalari ko‘payadi. Qor yog‘sa hamkasblarimiz  yo‘lovchilar xavfsizligi uchun ertalabgacha yo‘llarni tozalab qo‘yadilar.

8—10 soat davomida uch smenada ishlaymiz.

13 yildan beri shu kasb egasiman. Oila a’zolarim ham, o‘zim ham shunga ko‘nikkanmiz.

Erta tongdan boshlagan safarimizda Obodonlashtirish xodimlariga ko‘zimiz tushdi. Ular qalin qorlari bilan keladigan qishda yo‘laklarni odatdagidek supurmaydi, balki ayol-u erkak tengma-teng kuraydi. Shu paytda hovlimizning tomini va kichkina sahnini qalin qordan kurash uchun qanchalik zaxmat chekishimizni eslash qiyin emas.

Sovuqda ishlash qiyin. Qor yoqqan kunlari supurishni imkoni yo‘q, shuning uchun barcha bilan tengma-teng kuraymiz. Kasal bo‘lgan paytlarim ham bo‘ladi, lekin hech nolimaganman, baribir ishga qaytib chiqqanman.

4 ta bolam bor. Ularni yedirish, kiydirish va o‘qitish kerak. Ishimizda bayram paytlari rag‘bat sifatida ro‘zg‘orga kerakli oziq-ovqatlar berib turiladi.

Keyingi suhbatdoshimiz ko‘p yillar davomida odamlar uzog‘ini yaqin qilib kelayotgan “Gazel” yo‘nalishli taksi haydovchisi bo‘ldi. U hozirgi paytda haydovchilarga ishlash og‘irlashgani, “kunlik plan”ni to‘ldirish haqida hikoya qildi.

Haydovchilik faoliyati hozirgi sharoitda qiyin. Ko‘p haydovchilar gaz masalasi tufayli qiynalyapti. Ular kechasi 01:30—02:00 da gaz quyish shoxobchalarida navbat olib, ertalab 06:00—07:00 da u yerdan chiqib ishga kelishyapti.

Odamlar bilan ishlar ekanmiz, ulardan yuztasi raxmat aytsa, baribir bittasi qarg‘ab ketadi. Bunaqa vaziyatlar ham bo‘lib turadi.

Bugungi kunda haydovchilarning kunlik rejasi — 300 ming so‘m. Yo‘l haqi 3 ming so‘m va mashinaga sarflanadigan gaz 150 ming so‘m atrofida. Bulardan tashqari u bola-chaqasiga 4 ta non olib kirolmasa qanaqa shofyor bo‘ladi?

“Daryo” jamoasi turli qahramonlar va ularning faoliyati bilan tanishishda davom etadi. Siz ham ana shunday qahramonlarni bilsangiz bizga xabar bering va biz sizni topamiz.