Toshkent shahrida joylashgan Yagona imtihon markazida jinoyat ishlari bo‘yicha Mirobod tuman sudining sayyor sud majligi bo‘lib o‘tdi. Unda 5 nafar fuqaroga milliy haydovchilik guvohnomasini olish uchun amaliy va nazariy imtihonlardan muvaffaqiyatli o‘tgani to‘g‘risidagi soxta sertifikat tayyorlab bergan shaxs ustidan jinoyat ishi ko‘rib chiqildi. Bu haqda “Daryo” muxbiri xabar bermoqda.
Aniqlanishicha, 40 yoshli xususiy avtomaktab o‘qituvchisi R.Q. o‘zining shaxsiy kompyuteri orqali 5 nafar fuqaroga milliy haydovchilik guvohnomasini olish uchun amaliy va nazariy imtihonlardan muvaffaqiyatli o‘tgani haqida soxta sertifikat tayyorlab bergan.
Fuqarolar sertifikatlarni milliy haydovchilik guvohnomasini rasmiylashtirish maqsadida Yo‘l patrul xizmati bo‘limiga olib borgan vaqtda tekshiruvlar natijasida soxta ekani aniqlangan.
“Fuqarolar menga turli vaqtlarda imtihondan o‘tishga yordam so‘ragan bo‘lsada, men ularga bir vaqtda sertifikatlarini qalbakilashtirib, shaxsiy imtihon varaqalariga imtihondan o‘tganligi haqida qalbaki muhr bosib berganman. Ular mendan olgan hujjatlarni qalbaki ekanligini bilmasdan turib YPXga topshirishgan. Menga iltimos qilganligi uchun, ularga rahmim kelib, ularga qalbaki sertifikat tayyorlab berganman va shaxsiy imtihon varaqasiga “Topshirdi” muhrini bosib berganman. Muhrlarni yoniga esa o‘zim xoxlagan imzoni qo‘yib yuborganman. Sertifikatlarini qalbakilashtirib berganimdan hech qanday moddiy manfaatdor bo‘lmaganman. Men sodir qilgan qilmishimdan pushaymonman”, — dedi sudlanuvchi.
Mirobod tumani prokurori o‘rinbosari Shuxrat Sherkulovning aytishicha, ayblanuvchi harakatlari bilan, bir guruh shaxslar tomonidan oldindan til biriktirib soxtalashtiruvchining o‘zi yoki boshqa shaxs foydalanishi maqsadida muayyan huquq beradigan yoki muayyan majburiyatdan ozod etadigan rasmiy hujjatlar tayyorlashi yoki rasmiy hujjatlarni qalbakilashtirishi yoxud bunday hujjatlarni sotishi, shunday maqsadlarda korxona, muassasa yoki tashkilotning qalbaki shtamplari, muhrlari, blankalarini tayyorlash yoxud sotish hamda hujjatning qalbaki ekanligini bilgani holda undan foydalanishda ifodalangan Jinoyat kodeksining 228-moddasi 2-qismi “b” bandi va 228-moddasi 3-qismida ko‘rsatilgan jinoyatni qasddan sodir etgan.
“Sudlanuvchiga muqaddam jinoyat ishlari bo‘yicha Yashnobod tuman sudining hukmiga ko‘ra, O‘zlashtirish yoki rastrata yo‘li bilan talon-toroj qilish jinoyatini sodir etganlikda aybli deb topilib, oylik ish haqining 20 foizini davlat foydasiga o‘tkazish sharti bilan 1 yil muddatga axloq tuzatish ishlari jazosi tayinlangan bo‘lsada, bundan o‘ziga tegishli xulosa chiqarmasdan, yana jinoyat sodir etish yo‘liga kirgan. U “hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish” jinoyatini sodir etgan”, — dedi Shuxrat Sherkulov.
Sud to‘plangan hujjatlar va taraflar keltirgan ma’lumotlarni eshitib hukm qildi. Sudning hukmiga ko‘ra, sudlanuvchi Jinoyat kodeksining 228-moddasi 2-qismi “b” bandida nazarda tutilgan jinoyatni sodir etganlikda aybdor deb topildi va ish haqining 20 foizini davlat daromadi hisobiga ushlab qolgan holda 2 yil 6 oy axloq tuzatish ishlari jazosi tayinlandi.
Sudlanuvchi Jinoyat kodeksining 59-moddasi 8-qismi tartibida tayinlangan jazoga jinoyat ishlari bo‘yicha Yashnabod tuman sudining 2022-yil 5-oktabrdagi hukmi bilan tayinlangan jazoni qisman qo‘shish yo‘li bilan uzil-kesil ish haqining 20 foizini davlat daromadi hisobiga ushlab qolgan holda 3 yil axloq tuzatish ishlari jazosi tayinlandi.
Hukm ustidan taraflar hukm e’lon qilingan kundan e’tiboran yigirma sutka ichida, mahkum hukm nusxasini olgan kundan e’tiboran shu muddat ichida, apellyatsiya tartibida Toshkent shahar sudi apellyatsiya instansiyasiga shikoyat berishi yoki protest bildirishi mumkin.
Izoh (0)