Тошкент шаҳрида жойлашган Ягона имтиҳон марказида жиноят ишлари бўйича Миробод туман судининг сайёр суд мажлиги бўлиб ўтди. Унда 5 нафар фуқарога миллий ҳайдовчилик гувоҳномасини олиш учун амалий ва назарий имтиҳонлардан муваффақиятли ўтгани тўғрисидаги сохта сертификат тайёрлаб берган шахс устидан жиноят иши кўриб чиқилди. Бу ҳақда «Дарё» мухбири хабар бермоқда.
Аниқланишича, 40 ёшли хусусий автомактаб ўқитувчиси Р.Қ. ўзининг шахсий компьютери орқали 5 нафар фуқарога миллий ҳайдовчилик гувоҳномасини олиш учун амалий ва назарий имтиҳонлардан муваффақиятли ўтгани ҳақида сохта сертификат тайёрлаб берган.
Фуқаролар сертификатларни миллий ҳайдовчилик гувоҳномасини расмийлаштириш мақсадида Йўл патруль хизмати бўлимига олиб борган вақтда текширувлар натижасида сохта экани аниқланган.
«Фуқаролар менга турли вақтларда имтиҳондан ўтишга ёрдам сўраган бўлсада, мен уларга бир вақтда сертификатларини қалбакилаштириб, шахсий имтиҳон варақаларига имтиҳондан ўтганлиги ҳақида қалбаки муҳр босиб берганман. Улар мендан олган ҳужжатларни қалбаки эканлигини билмасдан туриб ЙПХга топширишган. Менга илтимос қилганлиги учун, уларга раҳмим келиб, уларга қалбаки сертификат тайёрлаб берганман ва шахсий имтиҳон варақасига «Топширди» муҳрини босиб берганман. Муҳрларни ёнига эса ўзим хохлаган имзони қўйиб юборганман. Сертификатларини қалбакилаштириб берганимдан ҳеч қандай моддий манфаатдор бўлмаганман. Мен содир қилган қилмишимдан пушаймонман», — деди судланувчи.
Миробод тумани прокурори ўринбосари Шухрат Шеркуловнинг айтишича, айбланувчи ҳаракатлари билан, бир гуруҳ шахслар томонидан олдиндан тил бириктириб сохталаштирувчининг ўзи ёки бошқа шахс фойдаланиши мақсадида муайян ҳуқуқ берадиган ёки муайян мажбуриятдан озод этадиган расмий ҳужжатлар тайёрлаши ёки расмий ҳужжатларни қалбакилаштириши ёхуд бундай ҳужжатларни сотиши, шундай мақсадларда корхона, муассаса ёки ташкилотнинг қалбаки штамплари, муҳрлари, бланкаларини тайёрлаш ёхуд сотиш ҳамда ҳужжатнинг қалбаки эканлигини билгани ҳолда ундан фойдаланишда ифодаланган Жиноят кодексининг 228-моддаси 2-қисми «б» банди ва 228-моддаси 3-қисмида кўрсатилган жиноятни қасддан содир этган.
«Судланувчига муқаддам жиноят ишлари бўйича Яшнобод туман судининг ҳукмига кўра, Ўзлаштириш ёки растрата йўли билан талон-торож қилиш жиноятини содир этганликда айбли деб топилиб, ойлик иш ҳақининг 20 фоизини давлат фойдасига ўтказиш шарти билан 1 йил муддатга ахлоқ тузатиш ишлари жазоси тайинланган бўлсада, бундан ўзига тегишли хулоса чиқармасдан, яна жиноят содир этиш йўлига кирган. У «ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш» жиноятини содир этган», — деди Шухрат Шеркулов.
Суд тўпланган ҳужжатлар ва тарафлар келтирган маълумотларни эшитиб ҳукм қилди. Суднинг ҳукмига кўра, судланувчи Жиноят кодексининг 228-моддаси 2-қисми «б» бандида назарда тутилган жиноятни содир этганликда айбдор деб топилди ва иш ҳақининг 20 фоизини давлат даромади ҳисобига ушлаб қолган ҳолда 2 йил 6 ой ахлоқ тузатиш ишлари жазоси тайинланди.
Судланувчи Жиноят кодексининг 59-моддаси 8-қисми тартибида тайинланган жазога жиноят ишлари бўйича Яшнабод туман судининг 2022 йил 5 октябрдаги ҳукми билан тайинланган жазони қисман қўшиш йўли билан узил-кесил иш ҳақининг 20 фоизини давлат даромади ҳисобига ушлаб қолган ҳолда 3 йил ахлоқ тузатиш ишлари жазоси тайинланди.
Ҳукм устидан тарафлар ҳукм эълон қилинган кундан эътиборан йигирма сутка ичида, маҳкум ҳукм нусхасини олган кундан эътиборан шу муддат ичида, апелляция тартибида Тошкент шаҳар суди апелляция инстанциясига шикоят бериши ёки протест билдириши мумкин.
Изоҳ (0)