Shahzodalar faqat ertaklardagina oddiy qizlarga uylanmaydi, real hayotda ham aktrisa, ofitsiant, psixolog yoki suzuvchi qizlar bilan oila qurgan aslzodalar bor: zamonamizning eng go‘zal va mashhur qirollik nikohi haqida ma’lumot beramiz.
Garri va Megan — Britaniya shahzodasi va aktrisa
2017-yilning 27-noyabr kuni dunyodagi eng mashhur shahzodalardan biri uelslik Garri amerikalik aktrisa Megan Marklni rafiqasi sifatida butun jamoatchilikka rasman tanishtirdi. Kinodagi faoliyati, turmushidan ajrashishi, kelib chiqishi va, albatta, irqiy mansublik, hatto bo‘lajak gersoginya terisining rangi ham muhokamadan chetda qolmadi — “bag‘rikeng” va “demokratik” dunyo bu yangilikdan aqldan ozay dedi.
Mavzuga doir: Sobiq malikalar: rasmiy vazifalaridan voz kechib, o‘zi yoqtirgan faoliyat bilan shug‘ullanayotgan qirollik oilasi a’zolari
Xokon va Mette-Marit — Norvegiya valiahd shahzodasi va ofitsiant
Xokon va Mette-Marit 2001-yilda shov-shuvli janjaldan keyin turmush qurishadi. Norvegiya qirollik oilasi tengsiz nikohga unchalik qarshilik qilishmagan — bir vaqtlar qirol Xarald V Sonya ismli sotuvchi qizga uylangan, keyinchalik u Norvegiyaning sevimli malikasiga aylangan. Muammo bo‘lajak malikaning kelib chiqishida emas, balki uning juda “qora” o‘tmishida edi. Gap shundaki, Xokon bilan tanishishiga qadar Mette-Marit allaqachon ona edi. Ayolning taniqli narkodilerdan nikohsiz tug‘ilgan o‘g‘ilchasi bor edi. Bundan tashqari, Mette-Maritning o‘zi ham yoshligida taqiqlangan moddalarni iste’mol qilgan va hatto Norvegiyaning liberal qirollik oilasi ham bunday tarjimayi holni qabul qila olmasdi.
Mavzuga doir: Ofitsiant qizlar bilan hayot yo‘lini bog‘lagan mashhurlar (foto)
Ammo Xokon qarorida qat'iy turdi — Mette uning taqdiri ekanligini ta’kidladi. Shundan keyin ota-onasi ham o‘g‘lining baxtiga chin dildan quvonib, qarshilik qilishmaydi. Ularning to‘yi kuni Mette eri va o‘g‘lini mahkam quchoqlab, tinmay yig‘lagan.
Emmanuel va Klotilda — Venetsiya shahzodasi va aktrisa
2003-yil 25-sentabrda Venetsiya va Pyemont shahzodasi Emmanuel Filiberto de Savoy — XI asrdan beri mashhur bo‘lgan eng qadimgi Yevropa sulolalaridan birining vakili, yosh fransuz aktrisasi Klotilda Kurtoga uylandi. To‘y marosimi Santa Mariya del Anjeli soborida bo‘lib o‘tdi, bu yerda 1896-yilda kuyovning katta bobosi — Italiyaning bo‘lajak qiroli Viktor Emmanuel III ning ham nikohi bo‘lib o‘tgan.
Ammo Emmanuelning ota-onasi o‘g‘lining tanlovidan mamnun emasdi – bo‘lajak kelinining nafaqat zodagon emasligidan, balki uning kasbidan ham xijolat bo‘lishdi. Klotildaning o‘zi butun umri davomida “qalb olijanobligiga” ishonib, zamonaviy aristokratiyaga dosh bera olmasligini tan oldi. Shunday qilib, shahzoda va aktrisa o‘rtasidagi romantika janrning barcha qonunlariga ko‘ra — nafratdan sevgigacha rivojlandi. Vanihoyat shahzoda bahorda qizga turmush qurishni taklif qildi va kuzda juftlik turmush qurdi. O‘sha paytda kelinning olti oylik homilasi bor edi, biroq ularning 1200 ga yaqin odam qatnashgan to‘yi dabdaba bilan o‘tdi.
Mavzuga doir: Greys Kellidan Megan Marklgacha: Oligarx va qirollik oilasi vakillariga turmushga chiqqan aktrisalar (foto
Bugungi kunda er-xotin ikki qizni tarbiyalamoqda va Italiyaning asosiy yulduzlari bo‘lib qolmoqda: shahzoda Emmanuel monarxiyaning tiklanishini faol ravishda qo‘llab-quvvatlaydi, malika Klotilda esa nafaqat erini qo‘llamoqda, balki qirollik a’zosi bo‘lishiga qaramay, o‘zi hamon filmlarda rol ijro etmoqda.
Uilyam va Keyt — Britaniya shahzodasi va veb-dizayner, marketing bo‘yicha mutaxassis
Butun dunyo tomosha qilagan dabdabali to‘ydan oldin juftlikning munosabatlari juda beqaror edi. Uilyam universitetda tanishgan do‘sti Keyt Middltonga hatto jurnalistlar “intizor Ketti” deb laqab qo‘yishgan. To‘g‘ri, Ketrin, haqiqatan ham, shahzodaning barcha o‘yin-kulgilari va uzoq davom etuvchi sayohatlariga sabr bilan chidadi, lekin kutilmaganda munosabatlarni o‘zi tugatdi.
Munosabatlarga nuqta qo‘yilgach, Uilyam bir necha bor boshqa ayollar bilan muloqotda bo‘lgan, ammo xató qilganini anglagan shahzoda Keytga turmush qurish taklifini beradi. Mish-mishlarga ko‘ra, uzoqni ko‘ra oladigan buvisi Yelizaveta nabirasining uylanishiga hissa qo‘shgan — axir, mas’uliyatli va jiddiy Keyt, hatto qiz zodagon bo‘lmasa ham, qirolichaga juda yoqib qolgandi. Bundan tashqari Keytning onasi Kerol Middlton ham bu borada qiziga yaxshigina maslahatlar berib turgan.
Mavzuga doir: Qizlarini bo‘lajak qirolicha va millioner xonim qilib tarbiyalagan sobiq styuardessa — Kerol Middlton hikoyasi (foto)
2011-yilda to‘y bo‘lib o‘tdi. Hozirda juftlik baxtli oila bo‘lib, uch farzandni tarbiyalamoqda.
Abdulla va Raniya — Iordaniya shahzodasi va bank xodimi
Raniya Faysal al-Yasin monarxiyaga hech qanday aloqasi bo‘lmagan oilada tug‘ilgan. Bo‘lajak qirolichaning kelib chiqishi falastinlik bo‘lgan ota-onasi Kuvaytda yashagan. O‘z biznesini ochishni orzu qilgan Raniya Qohiradagi Amerika universitetida ta’lim oladi. O‘qishi tugagach, qiz Iordaniyaga ko‘chib keladi. Mahalliy Citibank’ka ishga joylashgan Raniya shu yerda shahzodani uchratadi.
Mavzuga doir: Zamonamiz Zolushkasi: Bir vaqtlar Apple kompaniyasiga ishga olinmagan Iordaniya malikasi Raniya al-Abdulla hikoyasi
Felipe va Letisiya — Asturiya shahzodasi va telejurnalist
Felipe va Letisiya cho‘kib ketgan tanker haqidagi reportaj syomkasida tanishib qoladi — shahzoda bir ko‘rishda sevib qolgandi. Bir necha oy o‘tgach, jurnalistning qo‘lini so‘raydi. Bu to‘yni butun dunyo kuzatdi. Kelin nafaqat aslzodaligi bilan maqtana olmasdi, balki 1-turmushidan ajrashgan ham edi. Biroq qirollik oilasining boshqa iloji qolmagan: valiahd shahzoda Felipe ota-onasiga ultimatum qo‘yadi — yo to‘y yoki taxtdan voz kechish. Yaxshiyamki, Letisiyaning birinchi nikohi to‘ysiz bo‘lgan, shuning uchun hatto katolik cherkovi bo‘lajak Ispaniya qirolining ajrashgan ayol bilan nikohiga e’tiroz bildirmaydi.
Mavzuga doir: Fotogalereya: Dunyoning go‘zal va mashhur birinchi xonimlari
Bugungi kunda qirol Filipp VI va uning rafiqasi Letisiya oilaviy baxtning timsoli bo‘lib qolmoqda (er-xotinning ikki farzandi bor). To‘g‘ri, Ispaniya qirolichasi vaqti-vaqti bilan jamoatchilikni hayratda qoldiradi: qaynonasi bilan janjallashadi yoki rasmiy tadbirga mutlaqo mos bo‘lmagan kiyim kiyadi — sobiq jurnalist Letisiya sobiq hamkasblarining e’tiborini qanday jalb qilishni biladi.
Karl Filipp va Sofiya — Shvetsiya shahzodasi va model
Bu juftlikning taqdirlarini bog‘lashlari va birgalikda baxtli bo‘lishlari uchun nafaqat shved qiroli va qirolichasining donoligi, balki qirollik saroyining PR xizmatining ham hissasi katta. Shahzoda qaylig‘ining o‘tmishdagi karyerasi qora dog‘lardan xoli emasdi — yarimyalang‘och fotosessiyalar, ikkinchi darajali realiti-shoular va shov-shuvli vaziyatlar. Ammo shved shahzodasi unga oshiq edi, shuning uchun uning oilasi Sofiya Hellkvistni mukammal malika qilish uchun hammasiga ko‘z yumdi.
Mavzuga doir: Zolushkalarning hayotdagi prototiplari: Hayotda haqiqiy shahzodalarni uchratgan oddiy ayollar (foto)
Ularning to‘yi munosabatlar boshlanganidan yillar o‘tib, 2015-yilda bo‘lib o‘tdi. Bugun shahzoda Karl Filipp va malika Sofiya ikki yoqimtoy farzandni tarbiyalamoqda, umumiy xayriya loyihalarida ishtirok etib, birgalikda baxtli hayot kechirmoqda.
Alber va Sharlin — Monako knyazi va suzuvchi
Monako shahzodasi Alber va Janubiy afrikalik professional suzuvchi Sharlin Vittstok tanishganidan 11 yil o‘tgach turmush qurishadi. Ularga rasmiy ravishda taqdirlarini bog‘lashlariga hech narsa to‘sqinlik qilmagan, chunki Greys Kelli davridan beri hech kim kichik knyazlikdagi kelishmovchiliklarga e’tibor bermaydi.
Mavzuga doir: Belgiyadan Esvatinigacha: Turli mamlakatlarning malikalari qanday ko‘rinishga ega? (foto)
Sharlin vatani Janubiy Afrikada eng yaxshi suzuvchilardan biri edi. U Monakoga musobaqa tufayli keladi, lekin kutilmaganda o‘z sevgisini uchratadi. Bugungi kunda ularning nikohi unchalik yaxshi emasligi haqida gaplar tarqalgan. Biroq shuncha yil o‘tgach ham shahzoda va malika hali ham birga, go‘zal egizaklarni tarbiyalashmoqda — ajrashish niyatida emasga o‘xshaydi.
Fumixito va Kiko — Yaponiya shahzodasi va psixolog
Akisino shahzodasi Fumixito katta akasidan keyin Yaponiya taxtiga merosxo‘r sifatida ikkinchi o‘rinda turadi. Yaponiya imperator oilasidagi qoidalar qat’iy: bu yerda kelishmovchiliklar juda kam uchraydi. Bundan tashqari, agar kelin “xalq orasidan chiqqan” bo‘lsa, unda hech bo‘lmaganda moliyaviy jihatdan malika roliga mos kelishi kerak. Masalan, hozirgi imperator Michiko kelib chiqishi bilan maqtana olmasa ham uning otasi yirik tegirmon kompaniyasini boshqargan. Fumixitoning akasi mashhur diplomat Xisashi Ovadaning qiziga uylanadi, u hatto Yaponiyaning BMTda vakili bo‘lgan.
Mavzuga doir: Foto: Dunyoning turli mamlakatlari malikalari qanday hayot kechiradi?
Ammo akasidan oldin uylangan Fumixito o‘ziga boy bo‘lmagan qizni tanlaydi. Iqtisodiyot professorining qizi Kiko Kavashima bilan shahzoda Gakushuin universitetining birinchi kursida tanishadi va ko‘p o‘tmay unga turmush qurishni taklif qiladi. Sevishganlar to‘yni uch yil kutishi kerak edi — barcha rasmiyatchiliklar hal qilinmaguncha va Imperator uyi kengashi sulolada yangi oila yaratishga ruxsat bermaguncha ular shunday qilishga majbur bo‘ladi. Fumixito va Kiko 1990-yilda turmush quradi. Hozirda er-xotinning uchta farzandi bor: ularning eng kichigi shahzoda Hisahito hozirda Yaponiya taxtining bevosita vorisi hisoblanadi, chunki uning amakisi imperator Naruxitoning o‘g‘illari yo‘q.
Izoh (0)