Xitoy Rossiyaga harbiy yordam ko‘rsatdimi?

AQSH milliy razvedka rahbari Evril Xeyns Xitoy Rossiyaga qurol sotgani yoki yetkazib bergani haqida ma’lumot aniqlanmaganini aytdi. U Kaliforniyadagi milliy mudofaa forumida bu haqda ma’lumot berdi.

Razvedka rahbariga ko‘ra, Pekin Moskva bilan qo‘shma loyihalarni davom ettirmoqda va uni qo‘llab-quvvatlamoqda.

“Xitoy har ikki tomon bilan o‘ynashda davom etmoqda. Pekin Rossiya bilan bir qator masalalar bo‘yicha ishlab, aloqalarni davom ettirmoqda. Rossiyani xalqaro platformalar va boshqa vaziyatlarda qo‘llab-quvvatlash, yordam berish imkoniyatini topmoqda. Qurollar yetkazib berishga kelsak, biz hech qanday harbiy yordam ko‘rmadik. Ammo bunga aloqador ba’zi narsalar bizni chalkashtirmoqda, ularni kuzatishda davom etamiz”, — dedi Xeyns.

Rasmiy ravishda Xitoy mutlaq betaraflikka amal qiladi va Rossiya yoki Ukrainaga qurol yetkazib bermaydi. Pekinning ta’kidlashicha, aynan mana shu betaraflik mamlakat milliy manfaatlariga mos keladi.

Avvalroq AQSH Mudofaa vazirligi Xitoyning yadro arsenali kengayib borayotgani haqida ogohlantirgandi. Jumladan, bugungi kunda Pekinning arsenalida 400 dan ziyod jangovar kallaklar mavjud bo‘lib, yadro arsenalining kengayish sur’atlari shunga olib kelishi mumkinki, 2035-yilgacha Xitoy qo‘l ostida taxminan 1500 ta jangovar kallak bo‘ladi.