O‘zbekistonda ta’lim tizimining barcha bosqichlarida gender tengligi, zo‘ravonlikka murosasizlik tushunchalarini singdirib borish kerak. Bu haqda Senat raisi Tanzila Norboyev 6-dekabr kuni Toshkentda o‘tkazilgan zo‘ravonlikka qarshi kurashni institutsionalizatsiya qilish bo‘yicha xalqaro anjumanda aytib o‘tdi.
Uning ta’kidlashicha, gender tengligini ta’minlash, ayollarga nisbatan zo‘ravonlik masalalari hanuz dolzarb muammolardan bo‘lib qolmoqda. Ushbu masala barcha mamlakatlar uchun ham og‘riqlidir.
O‘tkazilgan tahlillar, shu jumladan, jurnalistlar va blogerlar ko‘targan muammolar asosida amaldagi qonunchilik chuqur tahlil qilindi. Soha mutaxassislari, NNT va OAV vakillari hamda jamoatchilik faolligida gender zo‘ravonlikning oldini olish mexanizmini takomillashtirishga oid qator qonun loyihalarini tayyorlash jarayoni yakuniga yetdi. Yaqin kunlarda ushbu hujjatlarni tegishli ravishda ko‘rib chiqish jarayoni boshlanadi. Lekin, ta’kidlash joizki, qonun qabul qilinishi — bu hali muammo hal etildi, degani emas.
Senat raisi jamiyatda gender zo‘ravonlikka mutlaqo murosasizlik muhitini shakllantirishga qaratilgan qonunchilikni yaratishdan tashqari, bu qonunlarni qat’iy ijrosini ta’minlash ustidan parlament nazoratini olib borish muhimligini qayd etdi.
“Aytish kerakki, gender tengligini ta’minlashga oid stereotiplarni bartaraf etishda hamda odamlarimiz tafakkurida zo‘ravonlikka qarshi toqatsizlikni shakllantirishda OAV va jamoatchilik vakillarining o‘rni salmoqli. Gender zo‘ravonligi muammosi nafaqat ayollarga, balki jamiyatning har bir a’zosiga tegishlidir — barchaga teng ta’sir ko‘rsatuvchi og‘riqli nuqtadir.
Shuning uchun ta’lim tizimining barcha bosqichlarida — maktabgacha bo‘lgan ta’limdan boshlab to oliy ta’limgacha uzviylikni ta’minlagan holda gender tengligi, zo‘ravonlikka murosasizlik tushunchalarini bolalarimiz ongiga qiziqarli o‘quv dasturlar orqali singdirib borishni yo‘lga qo‘yishimiz kerak. Mana shunda chinakam sog‘lom fikrlaydigan avlodni tarbiyalashga erishamiz”, — degan u.
Mavzuga doir:
Izoh (0)