O‘zbekiston bosh vaziri o‘rinbosari, energetika vaziri Jo‘rabek Mirzamahmudov benzin narxini asossiz oshirgan, Ai-91, Ai-92 markali benzin deya Ai-80 markali benzi sotgan AYOQSHlar bo‘yicha munosabat bildirdi.
“Bizning zavodlarda ishlab chiqarilayotgan va yetkazib berilayotgan benzin u Ai-80 rusumli benzin bo‘ladimi, Ai-92 bo‘ladimi, yo Ai-95 mi, sifati qattiq nazorat qilinadi. Bu borada iste’molchilarga yetkazib berish jarayonida ham qandaydir noqonuniy harakatlar bo‘lsa, uni ham nazorat qilamiz. Bu borada xabarlar tarqalganidan keyin biz neft-inspeksiya xodimlarini joylarga chiqargan holda benzin sifatini nazorat qilish, nafaqat sifatini, Monopoliyaga qarshi kurashish qo‘mitasi bilan birgalikda uning narxini ham nazorat qilish choralarini ko‘ryapmiz”, — degan u.
Energetika vazirining ta’kidlashicha, benzin narxini asossiz oshirib yuborgan yoki sifatsiz benzin, yoxud Ai-80 benzinini Ai-92 deb sotgan AYOQSHlarning litsenziyasi mahrum qilinishi ham mumkin.
“Shuni ta’kidlab o‘tmoqchimanki, benzin narxini asossiz oshirib yuborgan yoki sifatsiz benzin, yoxud Ai-80 benzinini Ai-92 deb sotgan AYOQSHlarga nisbatan albatta tegishli choralar ko‘riladi. Sifatini qalbakilashtirish, Ai-80 benzinini Ai-92 benzin deb sotgan AYOQSHlar listenziyasini bekor qilishgacha choralar ko‘riladi”, — deydi Jo‘rabek Mirzamahmudov.
Vazir, shuningdek, metan zapravkalar cheklangan muddatda ishlayotgan paytda benzinga talab ortganini hisobga olgan holda uning miqdorini oshirish choralari ko‘rilayotganini ham qayd etib o‘tdi.
“Albatta, savol tug‘iladi, hozirgi tabiiy gaz tanqisligi sharoiti, metan zapravkalar cheklangan muddatda ishlayotgan paytda benzinga talab ortib boradi. Bu bo‘yicha ham albatta choralar ko‘rilyapti. Jumladan, agar hozirgi kunga qadar kuniga 2,4 ming tonna Ai-80, ya’ni eng talab yuqori benzin sotuvga chiqarilgan bo‘lsa, shu kunlarda benzinga talab oshganidan boshlab bu ko‘rsatkich 3,5 ming tonnaga yetkazildi”, — degan u.
Izoh (0)