Ўзбекистонда таълим тизимининг барча босқичларида гендер тенглиги, зўравонликка муросасизлик тушунчаларини сингдириб бориш керак. Бу ҳақда Сенат раиси Танзила Норбоев 6 декабрь куни Тошкентда ўтказилган зўравонликка қарши курашни институционализация қилиш бўйича халқаро анжуманда айтиб ўтди.
Унинг таъкидлашича, гендер тенглигини таъминлаш, аёлларга нисбатан зўравонлик масалалари ҳануз долзарб муаммолардан бўлиб қолмоқда. Ушбу масала барча мамлакатлар учун ҳам оғриқлидир.
Ўтказилган таҳлиллар, шу жумладан, журналистлар ва блогерлар кўтарган муаммолар асосида амалдаги қонунчилик чуқур таҳлил қилинди. Соҳа мутахассислари, ННТ ва ОАВ вакиллари ҳамда жамоатчилик фаоллигида гендер зўравонликнинг олдини олиш механизмини такомиллаштиришга оид қатор қонун лойиҳаларини тайёрлаш жараёни якунига етди. Яқин кунларда ушбу ҳужжатларни тегишли равишда кўриб чиқиш жараёни бошланади. Лекин, таъкидлаш жоизки, қонун қабул қилиниши — бу ҳали муаммо ҳал этилди, дегани эмас.
Сенат раиси жамиятда гендер зўравонликка мутлақо муросасизлик муҳитини шакллантиришга қаратилган қонунчиликни яратишдан ташқари, бу қонунларни қатъий ижросини таъминлаш устидан парламент назоратини олиб бориш муҳимлигини қайд этди.
«Айтиш керакки, гендер тенглигини таъминлашга оид стереотипларни бартараф этишда ҳамда одамларимиз тафаккурида зўравонликка қарши тоқатсизликни шакллантиришда ОАВ ва жамоатчилик вакилларининг ўрни салмоқли. Гендер зўравонлиги муаммоси нафақат аёлларга, балки жамиятнинг ҳар бир аъзосига тегишлидир — барчага тенг таъсир кўрсатувчи оғриқли нуқтадир.
Шунинг учун таълим тизимининг барча босқичларида — мактабгача бўлган таълимдан бошлаб то олий таълимгача узвийликни таъминлаган ҳолда гендер тенглиги, зўравонликка муросасизлик тушунчаларини болаларимиз онгига қизиқарли ўқув дастурлар орқали сингдириб боришни йўлга қўйишимиз керак. Мана шунда чинакам соғлом фикрлайдиган авлодни тарбиялашга эришамиз», — деган у.
Мавзуга доир:
Изоҳ (0)