Buenos-Ayres sudi Argentina vitse-prezidenti, mamlakat sobiq prezidenti Kristina Fernandes de Kirshnerni firibgarlikda aybdor deb topdi va uni olti yilga ozodlikdan mahrum qildi. Bu haqda Reuters xabar berdi. Shuningdek, unga davlat lavozimlarini egallash bir umrga taqiqlandi.
Advokatlar qayd etishicha, u Argentina vitse-prezidenti lavozimini tark etmagunicha, o‘z mansabi kuchi ostida hibsga olinishi mumkin emas. Kristina de Kirshner hukmga qarshi shikoyat arizasi berishi kutilmoqda (prokuratura ham shunday ish tutadi). Advokatlar hisob-kitoblariga ko‘ra, sud jarayoni bir necha yillarga cho‘zilishi va kamida uch yil davom etishi mumkin.
Argentina vitse-prezidenti Santa-Krus provinsiyasida yo‘l ishlarini tashkillashtirishda firibgarlik va jinoiy til biriktirishda ayblangandi. Yakunda sud til biriktirish ayblovini olib tashladi.
Ayblov versiyasiga ko‘ra, Argentina hukumati Kristina Kirshnerning bosimi ostida biznesmen Lasaro Bayes kompaniyalari bilan shartnomalar tuzgan, u esa Kirshnerga va uning marhum turmush o‘rtog‘i Nestor Kirshnerga (u ham Argentina sobiq prezidenti) pul yetkazib turgan. Bayes olti yilga ozodlikdan mahrum qilingan.
Kristina Fernandes de Kirshner hukmni izohlar ekan, “sud mafiyasi” haqida gapirdi. U 2023-yilgi saylovda hech narsaga da’vogarlik qilmaslikka va’da berdi. 2023-yil dekabrida joriy hukumat vakolatlari muddati tugaganidan keyin iste’foga chiqishini aytdi.
69 yoshli Kristina Fernandes de Kirshner ketma-ket ikki marta, 2007—2015-yillarda Argentina prezidenti lavozimini egallagan. Uning turmush o‘rtog‘i, Nestor Kirshner esa 2003—2007-yillarda mamlakatga rahbarlik qilgan.
Mavzuga doir:
Izoh (0)