Буэнос-Айрес суди Аргентина вице-президенти, мамлакат собиқ президенти Кристина Фернандес де Киршнерни фирибгарликда айбдор деб топди ва уни олти йилга озодликдан маҳрум қилди. Бу ҳақда Reuters хабар берди. Шунингдек, унга давлат лавозимларини эгаллаш бир умрга тақиқланди.
Адвокатлар қайд этишича, у Аргентина вице-президенти лавозимини тарк этмагунича, ўз мансаби кучи остида ҳибсга олиниши мумкин эмас. Кристина де Киршнер ҳукмга қарши шикоят аризаси бериши кутилмоқда (прокуратура ҳам шундай иш тутади). Адвокатлар ҳисоб-китобларига кўра, суд жараёни бир неча йилларга чўзилиши ва камида уч йил давом этиши мумкин.
Аргентина вице-президенти Санта-Крус провинциясида йўл ишларини ташкиллаштиришда фирибгарлик ва жиноий тил бириктиришда айбланганди. Якунда суд тил бириктириш айбловини олиб ташлади.
Айблов версиясига кўра, Аргентина ҳукумати Кристина Киршнернинг босими остида бизнесмен Ласаро Баес компаниялари билан шартномалар тузган, у эса Киршнерга ва унинг марҳум турмуш ўртоғи Нестор Киршнерга (у ҳам Аргентина собиқ президенти) пул етказиб турган. Баес олти йилга озодликдан маҳрум қилинган.
Кристина Фернандес де Киршнер ҳукмни изоҳлар экан, «суд мафияси» ҳақида гапирди. У 2023 йилги сайловда ҳеч нарсага даъвогарлик қилмасликка ваъда берди. 2023 йил декабрида жорий ҳукумат ваколатлари муддати тугаганидан кейин истеъфога чиқишини айтди.
69 ёшли Кристина Фернандес де Киршнер кетма-кет икки марта, 2007—2015 йилларда Аргентина президенти лавозимини эгаллаган. Унинг турмуш ўртоғи, Нестор Киршнер эса 2003—2007 йилларда мамлакатга раҳбарлик қилган.
Изоҳ (0)