Buyuk Britaniya O‘zbekistonni rivojlanayotgan mamlakatlar uchun yangi savdo sxemasi (DCTS)ga kiritdi. Unga ko‘ra, 2023-yildan boshlab, mamlakat qo‘shimcha tovarlar guruhini import bojlarisiz yetkazib berish huquqini oladi. Bu haqda EastFruit xabar berdi.
Mazkur yangi savdo sxemasi (DCTS) 2021-yilning oktabr oyi oxirida O‘zbekiston benefitsiariga aylangan Umumiy preferensiyalar tizimining kengaytirilgan sxemasini (GSP Enhanced Framework – GSP EF) o‘rnini bosadi, — deyiladi xabarda.
Britaniya diplomatik vakolatxonasining oydinlik kiritishicha, O‘zbekiston avtomatik ravishda rivojlanayotgan mamlakatlar uchun yangi savdo sxemasiga kiritiladi va bu uchun qo‘shimcha tartib talab etilmaydi.
Sharoitlar takomillashmoqda. O‘zbekistonda ishlab chiqarilgan qo‘shimcha 156 ta mahsulot guruhi uchun import tariflari nolga tenglashadi, — deydi Britaniya elchixonasi vakillari.
O‘zbekiston Buyuk Britaniyaning Kengaytirilgan umumiy preferensiyalar tizimi (GSP EF)ga qo‘shilgan jahondagi birinchi mamlakat bo‘ldi. Bu haqida 2021-yilning oktabr oyi oxirida ma’lum bo‘lgan edi.
Mazkur qaror O‘zbekiston tomonidan 2021-yilning aprel oyida taqdim etilgan ariza ko‘rib chiqilishi natijasida qabul qilingan.
2021-yil 1-noyabr sanasidan boshlab, Buyuk Britaniyaning GSP EF doirasida O‘zbekistonda ishlab chiqarilgan tovarlarga nisbatan imtiyozlar qo‘llanila boshlandi.
Bu rejim O‘zbekiston uchun Buyuk Britaniyaga 7 800 turdagi tovarlarni import bojisiz eksport qilish imkonini beradi.
2023-yildan boshlab, yangi DCTS savdo sxemasiga o‘tish natijasida o‘zbekistonlik ishlab chiqaruvchilarning Buyuk Britaniyaga import bojisiz eksport qilishi mumkin bo‘lgan tovar turlari qo‘shimcha 156 taga kengayib, ularning umumiy soni 7 956 taga yetadi.
EastFruit ekspertlari ma'lumotlariga ko‘ra, 2022-yilning yanvar—oktabr oylarida O‘zbekistondan Buyuk Britaniyaga umumiy qiymati 20,1 million dollardan iborat tovarlar eksport qilib, o‘tgan yilning shu davriga nisbatan 4 barobar oshgan.
Izoh (0)