Hindistonning Haydarobod shahrida (Telengan shtati) kredit yoki debet plastik kartochkalaridagi pul evaziga tilla tanga sotib olish imkonini beruvchi bankomat mijozlarga xizmat ko‘rsata boshladi. Bu haqda The Economic Times'ga tayanib, “TASS” xabar bermoqda.
Ma’lumotlarga ko‘ra, bu nafaqat Hindistonda, balki butun dunyoda real vaqt rejimida ishlaydigan birinchi shunday bankomatdir.
Qurilma Hindistonning Goldsikka Pvt xususiy kompaniyasi tomonidan ishlab chiqarilgan bo‘lib, u qurilma orqali oltin sotishning innovatsion texnologiyasi ishlab chiqildi.
Bankomatda 5 kilogramm 24 karatli oltin tangalar saqlanadi. Bu ularni sakkizta variantda — 0,5 grammdan 100 grammgacha sotib olish imkonini beradi.
Bankomatning muhim xususiyati shundaki, uning ekranidagi oltin narxi London fond birjasidagi ushbu qimmatbaho metalning kotirovkalari o‘zgarishiga muvofiq real vaqt rejimida yangilanadi.
Bankomat xakerlikdan ishonchli himoya tizimiga ega. U videokamera, ovozli signalizatsiya bilan jihozlangan va politsiya bilan aloqa liniyasiga ega.
Goldsikka vakillarining so‘zlariga ko‘ra, qurilma barchaga bank yoki zargarlik do‘konlariga bormasdan, moliyaviy yo‘qotishlardan qochib, oltinga sarmoya kiritish uchun qulay imkoniyat yaratadi.
Faoliyatining birinchi kunida innovatsion bankomat 20 nafar mijozga xizmat ko‘rsatdi.
Goldsikka Hindistonda 3 mingta shunday bankomat o‘rnatib, o‘z mahsulotlari bilan jahon bozoriga chiqishni rejalashtirmoqda.
Avvalroq dollarning qadrsizlanishi oqibatida oltin narxi oshib borayotgani haqida xabar berilgandi.
Izoh (0)