Ko‘p yillik izlanishlar natijasida Sabzavot, poliz va kartoshka ekinlari ilmiy-tadqiqot instituti olimlari ilk bor rokambolning, ya’ni boshqacha aytganda sarimsoq-piyoz, Misr piyozi yoki ispan sarimsog‘i deb ham ataladigan sabzavotning yangi navini yaratishga muvaffaq bo‘ldi. Bu haqida EastFruit mutaxassislari xabar bermoqda.
Yangi nav “Baraka” deb nomlangan bo‘lib, u O‘zbekiston iqlim sharoitida yetishtirishga mosdir.
Rokambolning ushbu navi Intellektual mulk agentligi tomonidan 2022-yil oktabr oyida patentlangan.
Sabzavotning bu turi O‘zbekistonda hali keng tarqalmagan bo‘lsa-da, yaqin kelajakda uni mamlakatdagi deyarli barcha tomorqalarda uchratish mumkin bo‘ladi, deyiladi O‘zbekiston Qishloq xo‘jaligi vazirligi matbuot xizmatining materialida.
Rokambol piyoz va sarimsoqning ulkan gibrididir, piyozining diametri 6 dan 10 smgacha, 3-7 bo‘lakdan iborat bo‘lib, har bir bo‘lagining og‘irligi 80 grammgacha bo‘lishi mumkin.
O‘lchami kattaligi tufayli bu turdagi sabzavot “fil-sarimsoq” deb ham ataladi. Uning o‘ziga xos ta’mi bor — bir vaqtning o‘zida ham piyoz va ham sarimsoq ta’mini beradi.
Shu bilan birga, u sarimsoq kabi o‘tkir emas va piyoz kabi ko‘zni yoshlantirmaydi. Rokambolni to‘qsonbosti usulida ham (qishki), bahorda ham ekish mumkin.
EastFruit mutaxassislarining xabariga ko‘ra, postsovet mamlakatlarida rokambolning 3 navi yaratilgan, bular “Beliy slon”, “Jemchug” va “Yanichar” navlari. Ushbu navlar bir-biridan po‘stlog‘ining rangi, strelkasi bor yoki yo‘qligi bilan farqlanadi.
Xom shaklda rokambol sarxil sabzavot va ko‘katlardan tayyorlangan salatlar, pishloq va tvorog qo‘shilgan gazaklar bilan birga iste’mol qilinadi.
Bu sabzavotni tuzlash, marinadlash mumkin, shuningdek, u sho‘rvalar, go‘sht va baliqdan taomlar, pechda pishirilgan sabzavotlar, jarkop kabi ko‘plab ovqatlarga mazali qo‘shimcha sifatida ham ishlatiladi.
Izoh (0)