Buyuk Britaniyaning Shell neft kompaniyasi Yevropaning eng yirik biogaz ishlab chiqaruvchisi Daniyaning Nature Energy Biogas kompaniyasini 2 milliard dollarga sotib olishini e’lon qildi. Bu haqda “Kommersant” xabar bermoqda.
Mazkur bitim 2023-yilning birinchi choragida yakunlanishi kutilmoqda. Nature Energy 1979-yilda Daniyada tashkil etilgan bo‘lib, dastlab kompaniya tabiiy gazni taqsimlash bilan shug‘ullangan.
2015-yildan buyon kompaniya biomassaning metan parchalanishi natijasida olinadigan va tabiiy gazning to‘liq analogi bo‘lgan, undan faqat kelib chiqishi bilan farq qiluvchi biogaz yoki qayta tiklanadigan tabiiy gaz (RNG) ishlab chiqaradi.
Nature Energy hozirda kuniga 3 000 barrel neft ekvivalentini ta’minlaydigan 14 ta sanoat biogaz zavodiga ega (ulardan 12 tasi Daniyada).
Yevropa va Shimoliy Amerikada 30 ga yaqin yangi qurilmalar ishlab chiqilmoqda, bu esa 2030-yilga borib kuniga 3 300 barrel neft ekvivalentida gaz qazib olishni ko‘paytirish imkonini beradi.
Shell bilan kelishuv shartlariga ko‘ra, Daniya kompaniyasi o‘z brendini saqlab qoladi va Shellning bo‘linmasiga aylanadi.
Boshqa ko‘plab neft va gaz kompaniyalari singari Shell ham nol emissiya maqsadlariga erishish uchun kam uglerodli energiyaga o‘tish yo‘llarini qidirmoqda.
Mavzuga doir:
Izoh (0)