O‘zbekiston Oliy Majlisi Qonunchilik palatasi hamda Qonunchilik muammolari va parlament tadqiqotlari instituti vakillaridan iborat delegatsiya amaliy tashrif bilan Germaniyada bo‘lib turibdi, deb xabar bermoqda “Dunyo” AA.
Qayd etilishicha, 2-dekabrga qadar davom etadigan tashrif 28-noyabr kuni boshlangan bo‘lib, jarayon davomida mamlakat parlamenti a’zolari Germaniya Bundestagi faoliyatini tashkil etish tajribasi, jumladan, uning boshqaruvi, ilmiy xizmati, doimiy komissiyalari, parlament nazorati va murojaatlar organlari, kutubxonalar va boshqa tuzilmalari faoliyati bilan yaqindan tanishadi.
Haftalik dastur doirasida Germaniya deputatlarining partiya fraksiyalari, ixtisoslashtirilgan qo‘mitalari amaliy faoliyati, Bundestag va saylov okruglaridagi yalpi majlislar jarayoni bilan tanishishga ham alohida e’tibor qaratiladi. Shuningdek, Germaniya federal yerlarining vakillik organi bo‘lmish Bundesrat va Brandenburg federal yeri parlamenti (Landtag) faoliyati bilan tanishish ham rejalashtirilgan.
Germaniyaning ilg‘or tajribasini o‘rganish doirasida O‘zbekiston tomonining murojaatiga binoan Bundestag vakillari mamlakat budjetini rejalashtirish va uning bajarilishini monitoring qilish bo‘yicha Germaniya parlamenti faoliyati to‘g‘risida ham ma’lumot beradi.
Nemis mutaxassislarining fikricha, parlament a’zolarining mehnat samaradorligiga, asosan, Bundestagning axborot va ilmiy xizmatlari ko‘maklashadi, muayyan voqealarni tahlil qiladi va tegishli ma’lumotlarni taqdim etadi. Shu munosabat bilan, O‘zbekiston parlamenti vakillari Bundestagning axborot ishlari, jumladan, bosma va elektron nashrlari faoliyati bilan ham tanishadi.
Parlamentlararo aloqalar O‘zbekiston va Germaniya o‘rtasidagi samarali rivojlanayotgan ikki tomonlama munosabatlarning muhim tarkibiy qismi bo‘lib, bu boradagi hamkorlik faol rivojlanmoqda. So‘nggi 5 yilda parlament delegatsiyalarining 10 dan ortiq tashrii amalga oshirildi. Xususan, Germaniya Tashqi ishlar vaziri Annalena Berbokning yaqinda O‘zbekistonga tashrifi chog‘ida Bundestag deputatlari delegatsiyasi ham hamrohlik qildi.
Germaniya parlamenti a’zolari O‘zbekistonda amalga oshirilayotgan siyosiy-huquqiy islohotlar bilan bog‘liq dolzarb masalalarga bag‘ishlangan turli anjuman, forum va boshqa tadbirlarda muntazam ishtirok etib kelmoqda.
Izoh (0)