Farg‘ona viloyatida bojxonachilar yirik miqdorda uyali telefonlarni O‘zbekistonga noqonuniy olib kirilishini fosh etdi, deb xabar beradi Davlat bojxona qo‘mitasi.
Qayd etilishicha, Farg‘ona viloyati bojxona boshqarmasi viloyat DXX xodimlari bilan hamkorlikda Farg‘ona tumanida tezkor tadbir o‘tkazgan. Jarayon davomida fuqaro Y.I. boshqaruvidagi Mercedes-Benz yuk avtotransport vositasi to‘xtatilib, xolislar ishtirokida ko‘zdan kechirilgan. Natijada avtotransport vositasining yukxonasidagi maxsus yasalgan xufiyona qismida tegishli hujjatlari bo‘lmagan umumiy qiymati 1 milliard 13 million so‘mlik 19 turdagi jami 484 dona uyali aloqa vositalari borligi aniqlangan.
Yana bir holatda Farg‘ona viloyati bojxona boshqarmasi tomonidan o‘tkazilgan tezkor tadbirda Vodil tumanida Captiva avtomashinasi kuzatuvga olingan. Kuzatuvga tushganini sezib qolgan haydovchi zudlik bilan mashinadagi tovarlarni yo‘l chetidagi gulzor orasiga tashlab, yashiringan.
Mazkur tovarlar belgilangan tartibda va xolislar ishtirokida ko‘zdan kechirilganda umumiy qiymati 621 million so‘mlik 9 turdagi 270 dona uyali aloqa vositalari ekanligi aniqlangan.
Shuningdek, Namangan viloyati bojxona boshqarmasi DXX vakillari bilan hamkorlikda Pop tumanida tezkor tadbir o‘tkazilgan. Unda fuqaro I.B. boshqaruvidagi Cobalt avtomashinasi to‘xtatilib ko‘zdan kechirilganida avtomashina salonidagi sintetik qopda xorijda ishlab chiqarilgan 4 turdagi jami 138 dona uyali aloqa vositalari borligi ma’lum bo‘lgan.
Tezkor tadbir davom ettirilib, Namangan shahrida fuqaro X.M.ning yashash xonadoni belgilangan tartibda ko‘zdan kechirilganida bu yerda ham xuddi shu turdagi telefonlardan 17 donasi borligi aniqlangan.
Namangan viloyatida o‘tkazilgan tezkor tadbirlar natijasida tegishli hujjatlari bo‘lmagan umumiy qiymati 503 million 750 ming so‘mlik 155 dona uyali aloqa vositalari ashyoviy dalil sifatida olib qo‘yilgan.
Yuqoridagi holatlar yuzasidan tergovga qadar tekshiruv harakatlari davom ettirilmoqda.
Izoh (0)