Қирғизистонда мамлакат президенти Садир Жапаров иштирокида қурултой бўлиб ўтди. Президент расмийлар эндиликда ҳар йили қурултой олдида ҳисобот беришини маълум қилди. Бу ҳақда «Мир24» хабар берди.
Жапаровга кўра, 2023 йил мутасаддилар йиғилиш иштирокчилари олдида амалга оширилган ишлар юзасидан ҳисобот беради ва бу ҳар йили амалга оширилади.
«Масалан, фалон муаммони ҳал қилдик ёки аксинча, ҳал қилмадик дейишади. Ҳисобот шу тартибда бўлади. 2022 йил менинг фармоним бўйича қурултой ўтказдик. Умид қиламанки, 2023 йили депутатлар ‘Қурултой тўғрисидаъги қонунни қабул қилади», — дейди Садир Жапаров.
Қурултой қарорида бу таклиф Жогорку Кенешга киритилди. Президент Вазирлар Маҳкамасига чекка ҳудудларда аҳоли билан кўпроқ ишлаш, қирғиз халқининг турмуш даражасини ошириш бўйича топшириқ берди.
Қирғизистонда 25-26 ноябрь кунлари қурултой — миллий маслаҳат йиғилиши бўлиб ўтди. Унда бутун мамлакатдан мингдан ортиқ делегатлар иштирок этди. Қурултойдан мақсад ҳокимият ва республика аҳолиси ўртасида тўғридан-тўғри мулоқот ўрнатишдан иборат.
Қурултойнинг иккинчи куни делегатларнинг нутқ сўзлаш вақти олти дақиқагача оширилди. Йиғилишнинг биринчи кунида иштирокчилар уч дақиқа долзарб муаммоларни айтиш учун етарли эмаслигини айтган. Сўзга чиққанларнинг аксарияти чекка қишлоқларга ҳокимият вакилларининг келмаслиги, шу сабабли уларнинг муаммолари ўнлаб йиллар давомида ҳал этилмаганини таъкидлади.
Эслатиб ўтамиз, аввалроқ Қирғизистон парламентида туманларнинг рус тилидаги номини зудлик билан ўзгартириш таклиф қилинганди. Россия Думасида мазкур таклифга норозилик билдирилганди.
Изоҳ (0)