Andijonlik tadbirkor hokimlikdan pulini ololmayotganini aytdi, hokimlik esa hozir pul yo‘q demoqda

Andijon viloyatining Paxtaobod tumani “Hayrabod” mahallasida yashovchi tadbirkor Abdurashid Zokirov “Daryo”ga murojaat qilib, uch yil avval tuman hokimi topshirig‘iga ko‘ra qurilish ishlarini bajarib, mablag‘ini ololmayotganini aytmoqda. “Daryo” muxbiri murojaatini o‘rganish maqsadida Paxtaobod tumanida bo‘ldi.

Tadbirkor Abdurashid Zokirovning aytishicha, u 2019-yilda tumanning sobiq hokimi Mahmudjon Bozorovning iltimosiga ko‘ra, hokimlik va jamiyat o‘rtasida shartnoma tuzib, bir nechta qurilish ishlarini amalga oshirgan. Biroq oradan uch yil o‘tgan bo‘lsa-da, sobiq va amaldagi hokimlar tomonidan shartnoma shartlari bajarilmay, qilingan ishlar uchun mablag‘ to‘lanmagan.

Ushbu MCHJ boshlig‘ining dadasi va ta’sischisi bo‘laman. Shu sababli doimiy birga ish yuritamiz. 2019-yilda tuman hokimi Mahmud Bozorov oldiga chaqirib “Hoji aka, shu Paxtaobodimizning kirish qismida, daryo bo‘yida stella qurib, chiroyli qilib berasiz. Pulingizni to‘lab beraman”, dedi. Hokimga ishonib, ishni boshladik. Keyinchalik bevosita iltimoslarga binoan stelladan tashqari qolgan boshqa montaj ishlarini ham bajardik. Ammo uch yildan beri shu qilgan qurilish ishlarimizning pulini ololmayapmiz.

Bir necha marotaba tuman hokimiga, moliya boshlig‘iga, kim qilingan ishlarga javobgar bo‘lgan bo‘lsa shularga uchrashib chiqdik. Lekin pul to‘lash bo‘yicha hech qanday siljish bo‘lmayapti. Mana shuning natijasida uyimizda tinch o‘tirolmayapmiz. Har kuni shuning ortidan o‘g‘lim bilan kelishmovchiliklar kelib chiqyapti. Vaholanki, bu ishlar o‘z-o‘zidan bo‘lmaydi. Qurilishlarga juda ko‘p material sarflaganmiz. Shu qurilish materiallari olgan do‘kon egalari, ya’ni bizdan haqdor bo‘lgan tadbirkorlar ham qarzni berishimizni tinimsiz talab qilishmoqda. Na ko‘chada, na uyda tinchlik bor. Hattoki juma namoziga chiqqanimizda ham to‘xtatib, qarzimizni so‘rayapti, — deydi murojaatchi tadbirkor.

Tuman hokimining qurilish ishlari bo‘yicha o‘rinbosari Zafarbek Fozilovning ta’kidlashicha, qurilish va montaj ishlari qonun doirasida sifatli va loyiha hujjatlari asosida qilingan. Bu bo‘yicha shartnoma ham qilingan. Biroq Fozilov to‘lov masalasida aniq ma’lumotga ega emasligini bildirgan.

Hokim o‘rinbosari sifatidagi ish faoliyatimni 2022-yil mart oyidan boshlaganman. Ushbu qurilish firmasini yaxshi taniyman. 2019—2020-yillarda tuman hokimligi topshirig‘i bilan ijtimoiy soha obyektlari, bosh vazir qabulxonasi va tumanga kirishdagi joylarda stellalar qurilishini qilganidan xabarim bor. Lekin qo‘limda shu kunga qadar qaysi obyektlarda qancha mablag‘, moliyaviy ishlarda qancha qarzdorligi borligi bo‘yicha aniq ma’lumot yo‘q. Ammo hokimlikka ushbu masala bo‘yicha murojaat qilganidan xabarim bor.

Qurilish yo‘nalishi bo‘yicha shaxsan o‘zimga berilgan savolga javob beradigan bo‘lsam, qilingan ishlarga hech qanday e’tirozim yo‘q. Hammasi qonun doirasida sifatli va loyiha hujjatlari asosida qilingan. Tuman hokimligi bilan shartnoma ham qilingan. Haqiqatda mablag‘ to‘lanish masalasi shaxsiy fikrimcha, tuman hokimligi tomonidan orttirilgan budjet mablag‘i hisobidan bajariladi. To‘lov masalasiga keladigan bo‘lsak, hozirda budjet qanday holatda ekanligi bo‘yicha aniq ma’lumotga ega emasman, — deydi Zafarbek Fozilov.

Tuman hokimligining moliya bo‘limi boshlig‘i Javlonbek Faxriddinovning aytishicha, tadbirkorga orttirilgan mahalliy budjet mablag‘i hisobidan to‘lanishi belgilangan. Biroq mablag‘ turli daftarlar va ochiq budjet loyihalari uchun ajratilayotganligi sababli shartnomada belgilangan vaqtda to‘lanmasdan kelingan.

Moliya bo‘limiga rahbar bo‘lib o‘tganimdan keyin “Paxtaobod qurilish sifat” MCHJning rahbari bir marotaba xat bilan murojaat qilgan. Ularning hokimlikdan haqdorliklaridan xabarim bor. Bu bo‘yicha tuman hokimligi orqali yuborilgan xatga ham, o‘ziga ham javob yozib berganman. Mablag‘ning nega hozirgi kunga qadar to‘lanmay kelayotganligi sababiga keladigan bo‘lsak, ushbu qarzdorlik tuman mahalliy budjetining daromadlari rejasidan ortig‘i bilan bajarilishi hisobidan to‘lanishi belgilangan.

Hozirgi kunda daromadlarni ortig‘i bilan bajarilgan qismi prezident qaroriga asosan “ayollar”, “yoshlar” va “temir daftar”larga 15 foizdan, bundan tashqari ochiq budjet loyihalari uchun 30 foiz taqsimot qilinayotganligi sababli ortiqcha mablag‘ qolmayapti. Ya’ni belgilangan rejadan katta miqdorda mablag‘ orttirish imkoni bo‘lmayapti. Agarda to‘rtinchi chorakda daromadlar rejasi orttirilib bajarilsa, ushbu qismdan Хalq deputatlari tuman kengashining tegishli qaroriga asosan mablag‘ ajratib berishimiz mumkin. Agarda reja bajarilmasa, keyingi yilga ham o‘tishi mumkin, — deydi Javlonbek Faxriddinov.