Андижонлик тадбиркор ҳокимликдан пулини ололмаётганини айтди, ҳокимлик эса ҳозир пул йўқ демоқда

Андижон вилоятининг Пахтаобод тумани «Ҳайрабод» маҳалласида яшовчи тадбиркор Абдурашид Зокиров «Дарё»га мурожаат қилиб, уч йил аввал туман ҳокими топшириғига кўра қурилиш ишларини бажариб, маблағини ололмаётганини айтмоқда. «Дарё» мухбири мурожаатини ўрганиш мақсадида Пахтаобод туманида бўлди.

Тадбиркор Абдурашид Зокировнинг айтишича, у 2019 йилда туманнинг собиқ ҳокими Маҳмуджон Бозоровнинг илтимосига кўра, ҳокимлик ва жамият ўртасида шартнома тузиб, бир нечта қурилиш ишларини амалга оширган. Бироқ орадан уч йил ўтган бўлса-да, собиқ ва амалдаги ҳокимлар томонидан шартнома шартлари бажарилмай, қилинган ишлар учун маблағ тўланмаган.

Ушбу МЧЖ бошлиғининг дадаси ва таъсисчиси бўламан. Шу сабабли доимий бирга иш юритамиз. 2019 йилда туман ҳокими Маҳмуд Бозоров олдига чақириб «Ҳожи ака, шу Пахтаободимизнинг кириш қисмида, дарё бўйида стелла қуриб, чиройли қилиб берасиз. Пулингизни тўлаб бераман», деди. Ҳокимга ишониб, ишни бошладик. Кейинчалик бевосита илтимосларга биноан стелладан ташқари қолган бошқа монтаж ишларини ҳам бажардик. Аммо уч йилдан бери шу қилган қурилиш ишларимизнинг пулини ололмаяпмиз.

Бир неча маротаба туман ҳокимига, молия бошлиғига, ким қилинган ишларга жавобгар бўлган бўлса шуларга учрашиб чиқдик. Лекин пул тўлаш бўйича ҳеч қандай силжиш бўлмаяпти. Мана шунинг натижасида уйимизда тинч ўтиролмаяпмиз. Ҳар куни шунинг ортидан ўғлим билан келишмовчиликлар келиб чиқяпти. Ваҳоланки, бу ишлар ўз-ўзидан бўлмайди. Қурилишларга жуда кўп материал сарфлаганмиз. Шу қурилиш материаллари олган дўкон эгалари, яъни биздан ҳақдор бўлган тадбиркорлар ҳам қарзни беришимизни тинимсиз талаб қилишмоқда. На кўчада, на уйда тинчлик бор. Ҳаттоки жума намозига чиққанимизда ҳам тўхтатиб, қарзимизни сўраяпти, — дейди мурожаатчи тадбиркор.

Туман ҳокимининг қурилиш ишлари бўйича ўринбосари Зафарбек Фозиловнинг таъкидлашича, қурилиш ва монтаж ишлари қонун доирасида сифатли ва лойиҳа ҳужжатлари асосида қилинган. Бу бўйича шартнома ҳам қилинган. Бироқ Фозилов тўлов масаласида аниқ маълумотга эга эмаслигини билдирган.

Ҳоким ўринбосари сифатидаги иш фаолиятимни 2022 йил март ойидан бошлаганман. Ушбу қурилиш фирмасини яхши танийман. 2019—2020 йилларда туман ҳокимлиги топшириғи билан ижтимоий соҳа объектлари, бош вазир қабулхонаси ва туманга киришдаги жойларда стеллалар қурилишини қилганидан хабарим бор. Лекин қўлимда шу кунга қадар қайси объектларда қанча маблағ, молиявий ишларда қанча қарздорлиги борлиги бўйича аниқ маълумот йўқ. Аммо ҳокимликка ушбу масала бўйича мурожаат қилганидан хабарим бор.

Қурилиш йўналиши бўйича шахсан ўзимга берилган саволга жавоб берадиган бўлсам, қилинган ишларга ҳеч қандай эътирозим йўқ. Ҳаммаси қонун доирасида сифатли ва лойиҳа ҳужжатлари асосида қилинган. Туман ҳокимлиги билан шартнома ҳам қилинган. Ҳақиқатда маблағ тўланиш масаласи шахсий фикримча, туман ҳокимлиги томонидан орттирилган бюджет маблағи ҳисобидан бажарилади. Тўлов масаласига келадиган бўлсак, ҳозирда бюджет қандай ҳолатда эканлиги бўйича аниқ маълумотга эга эмасман, — дейди Зафарбек Фозилов.

Туман ҳокимлигининг молия бўлими бошлиғи Жавлонбек Фахриддиновнинг айтишича, тадбиркорга орттирилган маҳаллий бюджет маблағи ҳисобидан тўланиши белгиланган. Бироқ маблағ турли дафтарлар ва очиқ бюджет лойиҳалари учун ажратилаётганлиги сабабли шартномада белгиланган вақтда тўланмасдан келинган.

Молия бўлимига раҳбар бўлиб ўтганимдан кейин «Пахтаобод қурилиш сифат» МЧЖнинг раҳбари бир маротаба хат билан мурожаат қилган. Уларнинг ҳокимликдан ҳақдорликларидан хабарим бор. Бу бўйича туман ҳокимлиги орқали юборилган хатга ҳам, ўзига ҳам жавоб ёзиб берганман. Маблағнинг нега ҳозирги кунга қадар тўланмай келаётганлиги сабабига келадиган бўлсак, ушбу қарздорлик туман маҳаллий бюджетининг даромадлари режасидан ортиғи билан бажарилиши ҳисобидан тўланиши белгиланган.

Ҳозирги кунда даромадларни ортиғи билан бажарилган қисми президент қарорига асосан «аёллар», «ёшлар» ва «темир дафтар»ларга 15 фоиздан, бундан ташқари очиқ бюджет лойиҳалари учун 30 фоиз тақсимот қилинаётганлиги сабабли ортиқча маблағ қолмаяпти. Яъни белгиланган режадан катта миқдорда маблағ орттириш имкони бўлмаяпти. Агарда тўртинчи чоракда даромадлар режаси орттирилиб бажарилса, ушбу қисмдан Халқ депутатлари туман кенгашининг тегишли қарорига асосан маблағ ажратиб беришимиз мумкин. Агарда режа бажарилмаса, кейинги йилга ҳам ўтиши мумкин, — дейди Жавлонбек Фахриддинов.