“Hozir odamlarda mahalla raisi bo‘lish orzusi paydo bo‘lyapti” — Zafarbek Solijonov

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 8-soni mavzusi “Mahallada kim nimaga javob beradi?” bo‘lib, dastur mehmoni sifatida bloger, huquqshunos Zafarbek Solijonov taklif etildi.

Dastur mehmonining aytishicha, mahalla raisi lavozimi juda qiyin. U hududdagi turli yosh toifa vakillari bilan muloqotga kirishishi, muammoni hal qilishi zarur.

Bir inson telefon qildi va mahalla raisi bo‘lish niyatida ekanini aytdi. U nega bu vazifani qilishi kerakligini izohlayapti:

• Birinchidan, daromadi yaxshi ekan;
• Ikkinchidan, yigit musulmon — u insonlarga yaxshilik qilishni istaydi;
• Uchinchidan, o‘z mahallasi obodligi uchun harakat qilmoqchi.

Mendan yo‘l-yo‘riq so‘radi qanday qilib raislik qilish bo‘yicha. Odamlarimizda hozir mahalla raisi bo‘lish orzusi paydo bo‘lyapti,— deydi Zafarbek Solijonov.

“Ular tushunyapti. Bitta mahalla raisi orqali odamlar nima qila olishini, o‘zining xohishini davlatga qanday qilib o‘tkaza olishini bilib olyapti. Endi bu insonlar keyinchalik deputatlardan ham talab qilishni kuchaytiradi. Bu faqatgina fuqarolik jamiyati rivojlanishiga hissa qo‘shadi”, — degan u.