Ukrainadagi nizoni hal qilish uchun tinch yo‘lni birgalikda qidirib topish vaqti keldi, dedi Qozog‘iston prezidenti Qosim-Jo‘mart To‘qayev Kollektiv xavfsizlik shartnomasi tashkiloti (KXSHT) Kollektiv xavfsizlik kengashi majlisida. Bu haqda Qozog‘iston rahbari saytida aytiladi.
“Ukrainaga kelsak, tinchlik formulasini birgalikda kollektiv tarzda qidirish vaqti keldi, deb o‘ylayman…Qardosh rus va ukrain xalqlari o‘zaro xafagarchiliklar bilan o‘nlab-yuzlab yilga yuzko‘rmas bo‘lib ketishiga yo‘l qo‘ymasligimiz kerak”, — dedi To‘qayev.
U tomonlar “hech bo‘lmasa, yarashuvga erishish uchun har qanday imkoniyatdan foydalanishi” kerakligini qayd etdi va mart oyida Istanbulda bo‘lib o‘tgan muzokaralar nizoning diplomatik hal qilinishiga umid berganini, biroq “bitim turli sabablar bilan buzilgani”ni eslatdi.
Istanbuldagi uchrashuv nizoni tinch yo‘l bilan tartibga solish yo‘llarini qidirish doirasida tomonlar o‘rtasidagi so‘nggi muloqotlardan biri bo‘lgandi. Shundan keyin muzokaralar to‘xtab qoldi. Ikkala tomon vakillari ham muzokaralarga ochiqligini bildirib, bir-birini muloqot qilishni istamaslikda aybladi.
To‘qayev Ukrainadagi nizoni diplomatik yo‘l bilan hal qilish tarafdori ekanini avval ham aytgan, xususan, iyulda mamlakat prezidenti Vladimir Zelenskiy bilan suhbat chog‘ida buni ta’kidlagandi. O‘shanda Ukraina yetakchisi hamkasbiga “Ukraina hududiy yaxlitligini prinsipial ravishda qo‘llab-quvvatlayotgani” hamda LXR va DXR mustaqilligini tan olmagani uchun minnatdorlik bildirgandi.
Avvalroq Qozog‘iston prezidenti Qosim-Jo‘mart To‘qayev “Rossiyaning 2014-yilda Ukrainaga qilgan tajovuzini jamoatchilik oldida inkor etgani” uchun Ukrainaning “Tinchlikparvar” veb-sayti ma’lumotlar bazasiga kiritilgandi. Veb-saytda To‘qayevning Deutsche Welle bilan 2019-yildagi intervyusidan iqtibos keltirgan. Unda davlat rahbari Qozog‘iston “Qrimda sodir bo‘lgan voqealarni anneksiya deb atamasligini” aytgan. Shuningdek, u “Rossiya rahbariyatining dono va vijdonli ekaniga ishonishini” ta’kidlagan.
Izoh (0)