Amerikalik harbiylarga aloqador bo‘lganlar soxta Facebook va Instagram akkauntlari orqali AQSH manfaatlarini Markaziy Osiyo va boshqa davlatlarda ilgari surayotgan bo‘lishi mumkin. Meta kompaniyasi tegishli hisobotni e’lon qildi.
Ma’lum qilinishicha, bu Meta’ning onlayn ta’sir operatsiyasini xorijiy hukumatga emas, balki Vashingtonga bog‘layotgan va kam uchraydigan holat hisoblanadi. Hisobotga ko‘ra, AQSH armiyasiga aloqador shaxslar Facebook va Instagramda soxta akkauntlar orqali Vashington manfaatlarini qator davlatlarga yoygan.
Meta’ning xavfsizlik siyosatini buzgani uchun 39 ta Facebook akkaunti, 16 ta sahifa, ikkita guruh va 26 ta Instagram akkaunti o‘chirib tashlangan. Ular AQSHda ishga tushirilib, Afg‘oniston, Jazoir, Eron, Iroq, Qozog‘iston, Qirg‘iziston, Rossiya, Somali, Suriya, Tojikiston, O‘zbekiston va Yaman kabi qator mamlakatlarni qamrab olgan.
“Xoh xorij, xoh mahalliy bo‘lsin, xavfsizlik guruhlarimiz dunyo bo‘ylab onlayn operatsiyalarni topish va yo‘q qilishga e’tibor qaratmoqda”, deyiladi kompaniya hisobotida.
Tegishli operatsiya Twitter, YouTube, Telegram, “VKontakte” va “Odnoklassniki” kabi ko‘plab internet xizmatlarida amalga oshirilgan.
“Biz bu faoliyatni mintaqadagi ichki tekshiruvimiz doirasida aniqladik. Akkauntlar haqidagi ma’lumotni Grafika va Stenford internet observatoriyasidagi mustaqil tadqiqotchilar bilan bo‘lishdik. Ular 2022-yil 24-avgustda ushbu tarmoq faoliyati haqidagi o‘z xulosalarini internetda e’lon qildi. Garchi bu operatsiya ortidagi odamlar o‘z shaxsini yashirishga uringan bo‘lsa-da, tergovimiz akkaunt egalari AQSH harbiylari bilan aloqador shaxslar ekanini aniqladi”, deyiladi Meta hisobotida.
Izoh (0)