Rossiya prezidenti matbuot kotibi Dmitriy Peskov Armaniston bosh vaziri Nikol Pashinyan KXSHT sammiti yakunlari bo‘yicha deklaratsiyani imzolamaganiga munosabat bildirdi. Bu haqda “RIA Novosti” xabar berdi.
Kreml rasmiysiga Armanistonning deklaratsiyani imzolashdan bosh tortishi Kollektiv xavfsizlik shartnomasi tashkiloti (KXSHT) taqdiriga qanday ta’sir qilishi so‘ralgan.
“Hech qanday ta’siri yo‘q. Ayrim nuqtalarda ma’lum kelishmovchiliklar bor, bu 23-noyabr kuni ikki hujjatni imzolashga imkon bermadi. Lekin bu qaysidir ma’noda KXSHTning mavjudligini xavf ostiga qo‘yadi degani emas”, — deb javob berdi Dmitriy Peskov.
Bundan tashqari, Putinning matbuot kotibi KXSHTning 23-noyabrda bo‘lib o‘tgan yig‘ilishi ishtirokchi davlatlarning bunday tashkilotga ehtiyoji ortib borayotganini ko‘rsatganini aytdi.
Peskov Pashinyanning hujjatni imzolashdan bosh tortganini izohlar ekan, Armaniston tashkilot a’zosi bo‘lib qolishini aytgan.
“Uning a’zoligi saqlanib qoladi. Rahbarlarning yig‘ilishdagi nutqiga qaramay, kelishib olinmagan masalalar bor. KXSHT tadbiri ushbu formatga bo‘lgan talabni yana bir bor tasdiqladi”, — deya qo‘shimcha qilgan Kreml rasmiysi.
Ma’lumot o‘rnida, Armaniston bosh vaziri Nikol Pashinyan Kollektiv xavfsizlik kengashining Armanistonga yordam ko‘rsatish bo‘yicha qo‘shma chora-tadbirlar haqidagi deklaratsiyasi loyihasi oxirigacha ishlanmagani tufayli uni imzolashdan bosh tortgan.
“KXSHT ustavining 3-moddasiga muvofiq, a’zo mamlakatlar hududiy yaxlitligini kollektiv tarzda himoya qilish uchun ustuvorlik siyosiy vositalarga beriladi. Shuning uchun Armaniston KXSHT KXK qarori bilan Ozarbayjon tomonidan o‘z qo‘shinlarini zudlik bilan va so‘zsiz ravishda Armaniston Respublikasi hududidan olib ketib, 2021-yil 11-may holatidagi boshlang‘ich pozitsiyalarga joylashtirishga qaratilgan zarur siyosiy-diplomatik ishlar olib borilishini tezlashtirishni taklif qilamiz”, — degan Armaniston bosh vaziri.
U vaziyatning siyosiy jihatdan aniq baholanmasligi va yuqorida tilga olingan qarorning qabul qilinmasligi nafaqat KXSHTning ittifoqchilik majburiyatlaridan voz kechishini anglatishi, balki Ozarbayjon tomonidan “Armanistonga qarshi tajovuzni davom ettirish uchun KXSHT tomonidan yashil chiroq sifatida” talqin qilishi ham mumkinligini aytgan.
Izoh (0)