Россия президенти матбуот котиби Дмитрий Песков Арманистон бош вазири Никол Пашинян КХШТ саммити якунлари бўйича декларацияни имзоламаганига муносабат билдирди. Бу ҳақда «РИА Новости» хабар берди.
Кремль расмийсига Арманистоннинг декларацияни имзолашдан бош тортиши Коллектив хавфсизлик шартномаси ташкилоти (КХШТ) тақдирига қандай таъсир қилиши сўралган.
«Ҳеч қандай таъсири йўқ. Айрим нуқталарда маълум келишмовчиликлар бор, бу 23 ноябрь куни икки ҳужжатни имзолашга имкон бермади. Лекин бу қайсидир маънода КХШТнинг мавжудлигини хавф остига қўяди дегани эмас», — деб жавоб берди Дмитрий Песков.
Бундан ташқари, Путиннинг матбуот котиби КХШТнинг 23 ноябрда бўлиб ўтган йиғилиши иштирокчи давлатларнинг бундай ташкилотга эҳтиёжи ортиб бораётганини кўрсатганини айтди.
Песков Пашиняннинг ҳужжатни имзолашдан бош тортганини изоҳлар экан, Арманистон ташкилот аъзоси бўлиб қолишини айтган.
«Унинг аъзолиги сақланиб қолади. Раҳбарларнинг йиғилишдаги нутқига қарамай, келишиб олинмаган масалалар бор. КХШТ тадбири ушбу форматга бўлган талабни яна бир бор тасдиқлади», — дея қўшимча қилган Кремль расмийси.
Маълумот ўрнида, Арманистон бош вазири Никол Пашинян Коллектив хавфсизлик кенгашининг Арманистонга ёрдам кўрсатиш бўйича қўшма чора-тадбирлар ҳақидаги декларацияси лойиҳаси охиригача ишланмагани туфайли уни имзолашдан бош тортган.
«КХШТ уставининг 3-моддасига мувофиқ, аъзо мамлакатлар ҳудудий яхлитлигини коллектив тарзда ҳимоя қилиш учун устуворлик сиёсий воситаларга берилади. Шунинг учун Арманистон КХШТ КХК қарори билан Озарбайжон томонидан ўз қўшинларини зудлик билан ва сўзсиз равишда Арманистон Республикаси ҳудудидан олиб кетиб, 2021 йил 11 май ҳолатидаги бошланғич позицияларга жойлаштиришга қаратилган зарур сиёсий-дипломатик ишлар олиб борилишини тезлаштиришни таклиф қиламиз», — деган Арманистон бош вазири.
У вазиятнинг сиёсий жиҳатдан аниқ баҳоланмаслиги ва юқорида тилга олинган қарорнинг қабул қилинмаслиги нафақат КХШТнинг иттифоқчилик мажбуриятларидан воз кечишини англатиши, балки Озарбайжон томонидан «Арманистонга қарши тажовузни давом эттириш учун КХШТ томонидан яшил чироқ сифатида» талқин қилиши ҳам мумкинлигини айтган.
Изоҳ (0)