Yevroparlament 24-noyabr kuni rezolyutsiya qabul qilib, unda Belarus prezidenti Aleksandr Lukashenko rejimi Ukrainaga qarshi urushda Rossiya bilan bir xil javobgar ekani keltirib o‘tildi.
Belarus bo‘yicha qabul qilingan rezolyutsiyada mamlakatdagi 1400 nafardan ortiq siyosiy mahbusga nisbatan asossiz va siyosiy sabablarga ko‘ra chiqarilgan hukm keskin qoralangan. Yevropa parlamenti Lukashenko rejimining Rossiyaning Ukrainaga qarshi urushidagi ishtirokini keskin tanqid ostiga olgan.
Rezolyutsiyada Lukashenko rejimi Ukrainadagi harbiy jinoyatlar uchun Rossiya bilan birga javobgarligi, shu uchun xalqaro tribunal va xalqaro jinoiy sud oldida javob berishi kerakligi qayd etiladi.
Yevroparlament deputatlari YI davlatlari va Yevrokomissiyani Belarusga ham Rossiyaga qarshi sanksiyalarni qo‘llashga chaqirdi.
23-noyabr kuni Yevroparlament Rossiyani “terrorizm homiysi” deb e’lon qilish to‘g‘risidagi rezolyutsiyaga ovoz berdi. Unda Rossiyaga sanksiyalarni kechib o‘tishda yordam beradigan davlatlarga ham chora ko‘rilishi ta’kidlangan.
