Buxoro viloyatining Qorako‘l tumanida haydovchi boshqaruvni yo‘qotishi oqibatida Nexia yo‘l chetida kelayotgan bolalarni urib yuborgandi. Viloyat IIB ushbu YTHda jabrlangan bolalar ahvoli haqida ma’lumot berdi.
Unga ko‘ra, 23-noyabr kuni soat 16:20 larda Buxoro viloyati IIBning 102 avtomatlashtirilgan tizimiga Qorako‘l tumanidagi 15-maktab oldida yo‘l transport hodisasi sodir bo‘lgani to‘g‘risida xabar kelib tushgan. Zudlik bilan hodisa joyiga tuman Ichki ishlar bo‘limi boshlig‘i boshchiligida tergov tezkor guruhi chiqib, kechiktirib bo‘lmas tergovga qadar tekshiruv harakatlari olib borilgan.
Aniqlanishicha, Buxoro viloyati Qorako‘l tumanida yashovchi M.Z. ismli shaxs Nexia boshqaruvini yo‘qotib, yo‘lning chap tomonidagi piyodalar yo‘lakchasida harakatlanib borayotgan piyodalarni urib yuborgan.
Natijada piyodalar o‘tish joyidan yo‘lning narigi tomoniga o‘tayotgan velosiped haydovchisi yengil tan jarohati olgan va unga o‘sha zahoti birinchi tibbiy yordam ko‘rsatilib uyiga javob berib yuborilgan.
Bundan tashqari piyodalar yo‘lagidan harakatlanib borayotgan 2013-yilda tug‘ilgan F.A. yengil jarohat bilan va yana bir nafar piyoda 2013-yilda tug‘ilgan, 15-maktab 4-sinf o‘quvchisi U.U. taz suyak o‘ng tomoni yopiq sinishi tashxisi bilan tuman shifoxonasiga yotqizilgan. Hozirda malakali shifokorlar tomonidan tibbiy muolajalar olib borilmoqda.
Mazkur holat yuzasidan tuman Ichki ishlar bo‘limi tomonidan zaruriy ekspertizalar o‘tkazish bo‘yicha qarorlar tayinlandi va sabablarni aniqlash bo‘yicha surishtiruv hamda tergovga qadar tekshiruv harakatlari olib borilmoqda.
Izoh (0)