Toshkent shahrida bojxonachilar tomonidan noqonuniy muomaladan olib qo‘yilgan 34 ming 200 quti tamaki mahsulotlarini yo‘q qilish tadbiri o‘tkazildi.
Tadbirda Davlat bojxona qo‘mitasi, ekologiya, sanitariya-epidemiologiya, MIB va OAV vakillari ishtirok etdi. Ma’lum qilinishicha, yoqib yuborilgan tamaki mahsulotlarining umumiy qiymati 297 million 400 ming so‘mga teng.
Davlat bojxona qo‘mitasi axborot xizmati rahbari Husan Tangriyev yo‘q qilingan tamaki mahsulotlari Toshkent shahri va Toshkent viloyati hududida 4 ta holatda noqonuniy muomaladan olib qo‘yilganini aytdi.
“Jumladan, 2022-yil 30-mart kuni oldindan kuzatuvga olingan shaxs boshqaruvidagi yuk avtotransport vositasi Zangiota tumani hududida to‘xtatilib ko‘zdan kechirilganida, yukxonada xorijda ishlab chiqarilgan va raqamli markirovka kodlariga ega bo‘lmagan, qiymati 63 million so‘mlik 7 ming quti tamaki mahsulotlari borligi aniqlandi.
Foto: “Daryo”
2022-yil 20 va 27-aprel kunlari poytaxtimizning Chilonzor tumanida o‘tkazilgan tezkor tadbirlarda avvaldan kuzatuvga olingan shaxslardan biri muqaddam noqonuniy yo‘llar bilan olib kirilgan va sifati kafolatlanmagan, qiymati 82 million 100 ming so‘mlik 8 ming 600 quti, yana bir shaxs esa 61 million 300 ming so‘mlik 5 ming 600 quti tamaki mahsulotlarini yuk mashinalariga ortayotgan vaqtida to‘xtatib qolindi.
2022-yil 21-iyul kuni Toshkent viloyati bojxonachilari tomonidan aniqlangan navbatdagi holatda esa bojxona xodimlarini chalg‘itish maqsadida qiymati 91 million so‘mlik 4 turdagi 13 ming quti tamaki mahsulotlari yuk mashinasidagi yog‘och eshik romlari orasiga mohirlik bilan yashirilgani fosh qilindi”, – dedi mutaxassis.
Ma’lum qilinishicha, 2022-yil 22-noyabr holatiga ko‘ra, O‘zbekiston bojxonachilari tomonidan huquqni muhofaza qiluvchi turli idoralar bilan hamkorlikda aniqlangan 314 ta huquqbuzarlik holatlarida qiymati 19 milliard 200 million so‘mlik 1 million 578 ming 346 quti noqonuniy tamaki mahsulotlari ushlab qolingan. Aniqlangan holatlarining 71 tasi bo‘yicha jinoyat ishlari qo‘zg‘atilgan. 2021-yilning shu davrida esa 128 ta holat aniqlangan va 17 milliard 500 million so‘mlik 1 million 449 ming 305 quti noqonuniy tamaki mahsulotlari muomalasiga chek qo‘yilgan. O‘tgan yilning mos davriga nisbatan solishtirilganda, musodara qilingan kontrabanda tamaki mahsulotlari hajmi 9 foizga ko‘paygan.
Izoh (0)