Бухоро вилоятининг Қоракўл туманида ҳайдовчи бошқарувни йўқотиши оқибатида Nexia йўл четида келаётган болаларни уриб юборганди. Вилоят ИИБ ушбу ЙТҲда жабрланган болалар аҳволи ҳақида маълумот берди.
Унга кўра, 23 ноябрь куни соат 16:20 ларда Бухоро вилояти ИИБнинг 102 автоматлаштирилган тизимига Қоракўл туманидаги 15-мактаб олдида йўл транспорт ҳодисаси содир бўлгани тўғрисида хабар келиб тушган. Зудлик билан ҳодиса жойига туман Ички ишлар бўлими бошлиғи бошчилигида тергов тезкор гуруҳи чиқиб, кечиктириб бўлмас терговга қадар текширув ҳаракатлари олиб борилган.
Аниқланишича, Бухоро вилояти Қоракўл туманида яшовчи М.З. исмли шахс Nexia бошқарувини йўқотиб, йўлнинг чап томонидаги пиёдалар йўлакчасида ҳаракатланиб бораётган пиёдаларни уриб юборган.
Натижада пиёдалар ўтиш жойидан йўлнинг нариги томонига ўтаётган велосипед ҳайдовчиси енгил тан жароҳати олган ва унга ўша заҳоти биринчи тиббий ёрдам кўрсатилиб уйига жавоб бериб юборилган.
Бундан ташқари пиёдалар йўлагидан ҳаракатланиб бораётган 2013 йилда туғилган Ф.А. енгил жароҳат билан ва яна бир нафар пиёда 2013 йилда туғилган, 15-мактаб 4-синф ўқувчиси У.У. таз суяк ўнг томони ёпиқ синиши ташхиси билан туман шифохонасига ётқизилган. Ҳозирда малакали шифокорлар томонидан тиббий муолажалар олиб борилмоқда.
Мазкур ҳолат юзасидан туман Ички ишлар бўлими томонидан зарурий экспертизалар ўтказиш бўйича қарорлар тайинланди ва сабабларни аниқлаш бўйича суриштирув ҳамда терговга қадар текширув ҳаракатлари олиб борилмоқда.
Изоҳ (0)