Andijonda oyoqlari kombaynga kirib ketgan fuqaro jonlantirish bo‘limida vafot etgandi. Energetika vazirligi matbuot xizmati uning o‘limiga elektr ta’minotidagi uzilish sabab bo‘lganini rad etdi.
9-noyabr kuni bemor Jalaquduq tumanida kombaynga oyoqlari kirib ketishi oqibatida olgan jarohati tufayli jonlantirish bo‘limiga olib kelingan, biroq ko‘rsatilgan tibbiy muolajalarga qaramasdan 10-noyabr kuni vafot etgandi. Uning yaqinlari o‘limga elektr ta’minotidagi uzilish sabab bo‘lganini aytmoqda.
Energetika vazirligi bergan ma’lumotga ko‘ra, 10-noyabr kuni soat 21:58 dan 22:05 ga qadar (7 daqiqa) Qo‘rg‘ontepa tuman tibbiyot birlashmasini elektr energiyasi bilan ta’minlovchi 2 ta tarmoqdan birida uzilish sodir bo‘lgan.
Andijon viloyati sog‘liqni saqlash boshqarmasi ishchi guruhi tomonidan o‘tkazilgan dastlabki xizmat surishtiruvi natijalariga ko‘ra, kombaynga ikki oyog‘i bilan kirib ketib, juda og‘ir tan jarohati olgan bemorga belgilangan standartlar bo‘yicha muolajalar o‘tkazilgan.
Tezkorlik bilan o‘tkazilgan jarrohlik amaliyoti yakunlangan vaqtda elektr ta’minotida uzilish bo‘lmagan. Operatsiya tugaganidan keyin bir necha daqiqa vaqt o‘tib, elektr energiyasida uzilish sodir bo‘lgan.
“Ta’kidlash kerakki, bemorga muolajalar o‘tkazilayotgan operatsiya xonalaridagi barcha apparatlar yangi va zamonaviy bo‘lib, ular elektr ta’minotida uzilish bo‘lgan holatda ham 30 daqiqagacha mustaqil ishlaydi, ba’zilarining quvvati esa 4 soatgacha yetadigan qo‘shimcha elektr ta’minoti manbalariga ulangan”, — deyiladi vazirlik xabarida.
Hozirda holat yuzasidan Jalaquduq tumani IIB Tergov guruhi tomonidan tergovga qadar tekshiruv harakatlari olib borilmoqda. Marhumning o‘limi kelib chiqish sababini to‘liq hajmda o‘rganib chiqishlik uchun sudga oid komissiyaviy ekspertizasi tayinlangan.
Bundan tashqari, mehnat va texnika xavfsizligi qoidalariga rioya etilgan yoki etilmagani holati yuzasidan Mehnat xavfsizligi ekspertizasi tayinlangan. Tekshirish jarayoni Andijon viloyati prokuraturasi tomonidan nazoratga olingan.
Izoh (0)