Andijon viloyatining Xonobod shahridagi yo‘l qurilishida qariyb 87 ming dollar qo‘shib yozilgani aniqlanib, jinoyat ishi qo‘zg‘atildi. Bu haqda O‘zA xabar qildi.
Ma’lum qilinishicha, Xonobod—Turkobod avtomobil yo‘lining 0-7 km qismida yotqizilgan asfaltbeton qatlamlaridan olingan 73 ta namunalarning qalinligi loyiha va me’yoriy hujjatlar talablariga mos emasligi, qoplama qalinligi kam ekani aniqlangan.
Bosh pudratchi tomonidan yo‘l qoplamasining qatlamlar qalinligi me’yordan kam yotqizilganligi oqibatida jami 86 728 dollar miqdoridagi ish hajmi qo‘shib yozilganligi ma’lum bo‘ldi. Tekshirish davomida esa ushbu qo‘shib yozilgan ish hajmlari to‘liq bartaraf etilgan.
“O‘zyo‘linspeksiya”ning Yo‘l-qurilish materiallari sifatini nazorat qilish va yo‘l sinov laboratoriya boshqarmasi mas’ul xodimlari yotqizilgan asfaltbeton qatlamining qalinligi loyiha va me’yoriy hujjatlar talablariga mos bo‘lmasada, 2021-yilda ijobiy xulosa berib, davlat manfaatlariga juda ko‘p miqdorda zarar yetkazgan.
Holat yuzasidan “O‘zyo‘linspeksiya”ning mas’ul xodimlari va boshqalarning harakatlarida hokimiyat va mansab vakolatini suiiste’mol qilish hamda mansab soxtakorligida ifodalangan jinoyat alomatlari mavjudligini inobatga olib, Transport prokuraturasi tomonidan Jinoyat Kodeksining 205 (hokimiyat yoki mansab vakolatini suiiste’mol qilish) va 209-moddalari (mansab soxtakorligi) bilan jinoyat ishi qo‘zg‘atilgan.
Mavzuga doir: “O‘zyo‘linspeksiya”ga qurilish-montaj ishlari sifatsiz bajarilgani yuzasidan kelib tushayotgan murojaatlar soni oshdi
Izoh (0)