Qonunchilik palatasi Mudofaa va xavfsizlik masalalari qo‘mitasi tomonidan Qurolli kuchlar saflarida muddatli harbiy xizmatni o‘tab qaytgan fuqarolarni ish bilan ta’minlash borasida amalga oshirilayotgan ishlar Surxondaryo, Farg‘ona va Toshkent viloyatlari misolida nazorat-tahlil tartibida o‘rganildi.
O‘zbekiston Qurolli kuchlarida muddatli harbiy xizmatni o‘tab qaytgan fuqarolarni ishga joylashtirish maqsadida 2021-yilda respublika bo‘yicha 2 358 ta bo‘sh ish o‘rni yarmarkalari o‘tkazilgan. Mazkur yarmarkalarda 73 146 ta korxona, muassasa va tashkilot 567,2 mingta bo‘sh (vakant) ish o‘rinlari bilan qatnashgan. Ularda 2 ming nafarga yaqin muddatli harbiy xizmatni o‘tab qaytgan shaxslar ishtirok etib, 212 nafarining bandligi ta’minlangan.
Lekin sohada o‘z yechimini kutayotgan masalalar ham bor. Jumladan:
- nazorat-tahlil tadbiri davomida, muddatli harbiy xizmatdan qaytgan fuqarolarning bandligini ta’minlash maqsadida hokimliklar huzurida tashkil etilgan hududiy komissiyalar faoliyati samarali yo‘lga qo‘yilmagani aniqlandi;
- muddatli harbiy xizmatni o‘tab qaytgan shaxslarning bandligiga ko‘maklashish maqsadida tuman (shahar) hokimlarining tegishli qarorlariga asosan zaxiralangan ish o‘rinlariga joylashtirish va ish beruvchilarni rag‘batlantirish ishlari talab darajasida emas;
- muddatli harbiy xizmatni o‘tab qaytgan fuqarolarni kasbga tayyorlash, ularning malakasini oshirish va tadbirkorlik faoliyati bilan shug‘ullanish maqsadida uskunalar olish va ularni davlat ro‘yxatidan o‘tkazish bilan bog‘liq xarajatlar uchun jamg‘arma mablag‘lari hisobidan subsidiyalar ajratilmagan.
Izoh (0)