O‘zbekistonda 2019-yildan buyon mahalliy ko‘mirning narxi o‘zgarmagan. Bu haqda “O‘zbekko‘mir” AJ axborot xizmati “Daryo”ga ma’lum qildi.
Jamiyat axborotida aytilishicha, ko‘mir narxi aholi iste’molchilari uchun, ularning ijtimoiy himoyasi nazarda tutilgan holda, narx to‘rt yildan buyon o‘zgarishsiz qoldirilmoqda.
“Ko‘mir ta’minot” jamiyatiga qarashli omborlar orqali aholiga taklif etilayotgan mahalliy ko‘mirning bir tonnasi ‒ 300 ming 300 so‘mni tashkil qiladi. Hududiy ko‘mir omborlarida aholi tomonidan xarid qilingan mahsulot omborga qarashli avtotransportda bepul yuklab beriladi”, — deyiladi ma’lumotda.
Ta’kidlanishicha, har yili tabiiy gaz yetib bormagan mahallalar tomonidan ko‘mirga bo‘lgan ehtiyoj aniqlanadi va tegishli ro‘yxat shakllantirilib, tuman (shahar) hokimliklariga taqdim etiladi.
Mahalliy hokimliklar ushbu ro‘yxatlar asosida hududiy ko‘mir omborlariga buyurtma beradi va ko‘mir tarqatish jadvalini tasdiqlaydi. Aholi ushbu jadvalga asosan o‘ziga yaqin hududiy ko‘mir omboriga murojaat qilishi mumkin.
Eslatib o‘tamiz, “O‘zbekko‘mir” AJ ko‘mirni “Ko‘mir ta’minot” MCHJning ko‘mir omborlari manziliga yuklab jo‘natishni ta’minlaydi hamda uning sifati va hajmi uchun javob beradi.
Ma’umlot uchun, Angren ko‘mir koniga tegishli qo‘ng‘ir ko‘mir qattiqlik darajasi bo‘yicha 4-shkalada bo‘lib, nisbatan yumshoqlik xossasiga ega.
Shu bois sotib olingan ko‘mirning o‘z inkubatsiya davri va saqlash talablari mavjud. Taxminan 20 kundan keyin har qanday ko‘mir ham ochiq havoda qolsa, kun sayin o‘z xususiyatini yo‘qota boshlaydi.
Sifati buzilmasligi uchun uni maxsus omborlarda, ustini yopib saqlash tavsiya etiladi. Ochiq havoda qolgan ko‘mir qurib, uqalanib ketishi tabiiy.
Izoh (0)