Toshkent shahri va viloyatida kredit mablag‘lari evaziga xarid qilingan qoramol va metallni talon-toroj qilish holati aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Oqqo‘rg‘on tuman bo‘limi tomonidan tergovga qadar tekshiruv o‘tkazilgan. Unda T.ch. MCHJ rahbari X.Y. va boshqalar hududiy tijorat banki filialidan ajratilgan kredit mablag‘i evaziga xarid qilingan qoramollarni go‘yoki “J-R.” fermer xo‘jaligiga sotilgani haqida soxta hujjatlarni rasmiylashtirib, 100 bosh qoramolni naqd pulga sotib yuborgani aniqlangan. Ular jami 2,3 milliard so‘m kredit mablag‘ini o‘zlashtirish yo‘li bilan talon-toroj qilgan.
Shuningdek, departamentning Toshkent shahar boshqarmasi tomonidan tergovga qadar tekshiruv o‘tkazilgan. Unda A.S. MCHJ rahbari Y.T. bank filialidan ajratilgan 2,1 milliard kredit mablag‘i evaziga xarid qilingan metall mahsulotlarini naqd pulga sotib yuborgani aniqlangan. Shuningdek, mablag‘ni qaytarmaslik maqsadida garovga qo‘yilgan omborxona binosini taqiqdan yechish to‘g‘risida bankning xati va muhrini qalbakilashtirib, omborxonaga qo‘yilgan taqiqni bekor qilishga erishgan.
Holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 207-moddasi (mansabga sovuqqonlik bilan qarash) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)