“Muhrsiz, imzosiz qalamda yozilgan qog‘oz sabab uyimiz buzib tashlandi”. Qashqadaryolik fuqaro sudni adolatsizlikda ayblamoqda

Qashqadaryo viloyatining Shahrisabz tumanida yashovchi fuqaro Ravshan Sattorov 2017-yil sud qaroriga ko‘ra, yashab turgan xonadoni MIB tomonidan majburiy tartibda buzib tashlanganini, sudning bu qaroriga muhri, imzosi bo‘lmagan qog‘ozdagi ma’lumotlar asos bo‘lganini aytmoqda.

Uy-joyimiz 2017-yil sud qaroriga ko‘ra, majburiy ijro tomonidan buzdirib tashlandi. Uyda 7-8 nafar oila a’zolarimiz yashardi. Uyimiz buzilishiga marhum amakimning turmush o‘rtog‘i sudga shikoyat qilgani sabab bo‘ldi, — deydi murojaatchi Ravshan Sattorov.

Fuqaroning bildirishicha, marhum amakisining turmush o‘rtog‘i ularga tegishli yerga uy-joy qurib olganini aytib, sudga davo kiritgan.

Bizda 6 sotixdan 12 sotixli ikkita uchastka bor edi. Biri amakimniki edi. Amakim vafot etgach, uning ayoli bizga tegishli yerga uy qurib olgansizlar deb, uyimizni buzdirishni so‘rab sudga murojaat qildi. Mazkur ishni ko‘rib chiqqan sud qalam bilan yozilgan, na muhri va na imzosi bo‘lgan bir parcha qog‘ozni asos qilib, uyimizni buzish to‘g‘risida qaror chiqardi. Achinarlisi bu qog‘ozdagi ma’lumotni na arxitektura na kadastr tasdiqlagan. Kimningdir uyidan topib olingan qog‘ozda qalam bilan yozilgan ma’lumotlar biz yashab turgan uyning buzilishiga asos bo‘ldi. Sud bu haqda qarorida ham yozib, o‘sha qog‘ozni uy sxemasi sifatida qabul qilgan, — deydi uyi buzib tashlanganini aytgan murojaatchi.

Ravshan Sattorov sudda ularga tegishli uy 1994-yilda qurib bitkazilganini aytganini, ammo sud da’vogarning mazkur uy 1997-yil da’vogar tomonidan qurilgan poydevor ustida barpo etila boshlanganini aytgan gapiga ishonganini ta’kidlamoqda.

Men sudga uyimiz 1994-yilda qurib bitkazilganini isbotlovchi namunaviy shartnomani taqdim qildim. Ammo sud da’vogarning hech qanday hujjat taqdim qilmasa-da, bu uy ular tomonidan 1997-yilda qurilgan poydevor ustida barpo etilgani haqidagi gapiga ishondi va uning da’vosini qo‘llab-quvvatladi, — deydi u.

Ravshan Sattorov “Daryo” jurnalisti bilan suhbatida bu haqda shikoyat qilib, hatto Oliy sud raisi qabuliga ham kirganini ham ma’lum qildi.

Shu masala yuzasidan 2022-yilning 19-oktabr kuni Oliy sud raisi qabuliga ham kirdim. Kulgilisi, mas’ullar, raisning o‘zi emas, u tomonidan chaqirilgan sudyalar ham qo‘lda yozilgan, hech qanday imzo yoki muhri bo‘lmagan bir parcha qog‘ozni hujjat sifatida qabul qilishlari mumkinligini aytib, menga ters gapirishdi. “Nega bir necha yillardan beri tinchimaysan, kelishsang bo‘ladi-ku”, deya menga dakki ham berishdi, — deydi Ravshan Sattorov.

Murojaatchi Oliy sud mas’ullaridan ham hafsalasi pir bo‘lganini, biroq Oliy sud raisining shaxsan o‘zidan umidi borligini ta’kidlamoqda.

Oliy sud mas’ullari, sudyalari hech qanday imzosi yoki muhri bo‘lmagan bir parcha qog‘ozni hujjat sifatida qabul qilishlarini, shu bir parcha qog‘oz bilan uylar buzib tashlanishini oqlashlarini aytishgach, biz dardimizni kimga aytaylik. Shumi sudning adolati? Shumi xalq ishonch bildirgan Oliy sud?, — deydi u.

Shahrisabzlik Ravshan Sattorovning aytishicha, mazkur adolatsizlik Chiroqchi tumanlararo sudi sudyasi Jamol Hamrayev tomonidan amalga oshirilgan.

Chiroqchi tumanlararo sudi sudyasi Jamol Hamrayevning adolatsizligidan shikoyat qilib, boshqa joyga murojaat qildik. Eng kulgilisi biz ustidan shikoyat qilgan sudyaning o‘zi yana shu ishni qayta ko‘rdi. Jamol Hamrayev bizning uchta ishimizni o‘zi ko‘rdi. Biz bundan norozi bo‘lib, sudya almashtirilishi kerakligini so‘rab, iltimosnomalar kiritdik. Ammo foydasi bo‘lmadi. Ko‘pchilik “endi foydasi yo‘q, boisi sudyalar qarori O‘zbekiston Respublikasi nomidan chiqadi, agar bu qaror bekor bo‘lsa, uyni qayta qurib berish sudya zimmasiga tushib, mablag‘ davlat budjetidan qoplanishini inobatga olishadi va barcha sudya bunga qarshi turadi”, deyishyapti balki shu gaplarda jon bordir, — deydi murojaatchi.

Ravshan Sattorov marhum amakisiga tegishli yer hamon bo‘sh turganini, ayni kunga kelib buzib tashlangan uy ham xaroba holga kelib qolganini, da’vogar ayni kunda ham yerga hech qanday uy qurmaganini aytib, “hech qanday asoslarsiz, yashab turgan uyimiz buzib tashlanib, biz ko‘chada qoldik”, demoqda.

Oliy sud raisining qabuliga kirganimda rais ikki nafar sudyani chaqirdi. Ular faqat menga qarshi gapirib, birinchi sud chiqargan qarorni ro‘kach qilishmoqda. Men ularga sudya qaroridan tashqari ish hujjatlari bilan ham tanishib chiqdingizmi, nega faqat sudya qarorini o‘qib, xulosa qilyapsiz”, deb savol berdim. Savolimga javob berishni ham lozim topishmadi, — deydi fuqaro.

Murojaatchi mustaqil O‘zbekiston sudyalari qalam bilan chizilgan bir parcha qog‘ozni asos qilib, odamlarning uyini buzib tashlayversa, odamlar haqiqatga ishonmay qo‘yishini aytmoqda.

O‘sha uyda yashab fermerlik qilardik. Sudyalar bir parcha qog‘ozni asos qilib, uyimizni buzishgach, ayni kunda u yerda yashab ham bo‘lmaydi. Fermerlik faoliyatimiz tugadi, uyimiz buzilib, ko‘chada qoldik. Achinarlisi mustaqil O‘zbekiston sudyalari qalam bilan chizilgan bir parcha qog‘ozni asos qilib, odamlarning uyini buzib tashlayversa, odamlar haqiqatga ishonmay qo‘yadi-ku?, — deydi Ravshan Sattorov.

Murojaatchining qo‘shimcha qilishicha, da’vogar suddan keyin ularga murojaat qilib, 300 million so‘m pul berishsa, uyni buzdirish talabidan voz kechishini aytgan.

Sudda uyni qurgan ustalarni ham olib keldik. Ammo sud bularni inobatga olmadi. Da’vogarga uyni qurgan ustalarni ko‘rsatib, qay birini taniysiz, qaysiga pul bergansiz degan savollarni berdik. Tanimadi. Ayol kishi ekanini, qurilish ishlariga aralashmaganini aytdi. Eng achinarlisi, suddan so‘ng bizdan 300 million so‘m talab qildi. Shu pulni bersak, uyni buzdirish talabidan voz kechishini aytdi, — deydi uyi buzilganini aytayotgan murojaatchi.

Oliy sud axborot xizmati rahbari Aziz Abidov “Daryo” so‘roviga javoban murojaatchi Ravshan Sattorov Oliy sud raisi qabuliga kirib chiqqach, mazkur ishga doir hujjatlar Oliy sudga chaqirilganini va o‘rganilayotganini aytmoqda. Uninf aytishicha, o‘rganish natijalari haqida ma’lumot beriladi.

“Daryo” voqealar rivojini kuzatishda davom etadi.