Toshkent shahri Yashnobod tumanida fuqaroga kuch ishlatib, pullarini olib qo‘ygan soxta ichki ishlar xodimlari ushlandi. Bu haqda Tergov departamenti xabar bermoqda.
Ma’lum bo‘lishicha, 17-noyabr kuni soat 19:00 da ikki noma’lum shaxs oldindan o‘zaro jinoiy til biriktirib, o‘zganing mol-mulkini bosqinchilik yo‘li bilan talon-toroj qilmoqchi bo‘lgan. Yashnobod tumani “Cho‘lpon” mahallasi hududidan o‘tuvchi Kichik halqa yo‘li yoqasida bo‘la turib, 26 yoshli J.Q.ning oldiga kelib, unga o‘zlarini IIB xodimi deb tanishtirib, uni noqonuniy valyuta ayirboshlashda ayblagan. So‘ng Yunusobod tumani IIO FMBga olib borishlarini aytib, noma’lum shaxslardan birining boshqaruvidagi Nexia-3 avtomashinasiga o‘tqazib, tumani “Cho‘lpon” mahallasi hududiga olib borgan. J.Q.ni pichoq bilan qo‘rqitib, yuz va bosh qismlariga urib, tan jarohat yetkazib, 1 million 100 ming so‘m pulini tortib olgan.
Olib borilgan tergov-tezkor ishlar natijasida mazkur jinoyatni muqaddam sudlangan 30 yoshli A.Yo. va 35 yoshli N.U. sodir etilgani, hodisa sodir bo‘lgan joy hamda N.U.ning boshqaruvida bo‘lgan Nexia-3 ko‘zdan kechirilganda avtomashinaning yukxonasidan 1 dona oshxona pichog‘i ashyoviy dalil tariqasida rasmiylashtirib olingan.
Mazkur holat yuzasidan Mirobod tumani IIO FMB huzuridagi tergov bo‘limi tomonidan Jinoyat kodeksining 164-moddasi (bosqinchilik) 2-qismi “a” ,“b” bandlari bilan jinoyat ishi qo‘zg‘atilib, bosqinchilik sodir etgan shaxslarga nisbatan qamoqqa olish tarzidagi ehtiyot chorasi qo‘llangan. Hozirda tergov harakatlari olib borilmoqda.
Mavzuga doir:
Izoh (0)