Kamoliddin Rabbimov: “Ukraina va Rossiya o‘rtasidagi urush — Markaziy Osiyo mintaqasi uchun tarixiy bonus”

Toshkent shahrida 15-noyabr kuni o‘tkazilgan Markaziy Osiyo ekspertlari forumida nutq so‘zlagan siyosatshunos Kamoliddin Rabbimov mintaqa davlatlarini birlashishga undab, globallashuv jarayonidagi tahdidlarga faqat integratsiya orqali qarshi turish mumkin ekanini aytdi, deb xabar bermoqda “Daryo” muxbiri.

Kamoliddin Rabbimov nutqida o‘tgan asr avvalida Markaziy Osiyo davlatlarida birlik kuchli bo‘lganini, ammo Sobiq Ittifoq davridagi “bo‘lib tashlab, hukmronlik qil” tizimi davlatlarni degredatsiyaga uchratganini bildirdi.

Taxminan, bir asr oldin Markaziy Osiyoning mintaqaviy o‘ziga xosligi kuchli edi. Hududdagi aholi o‘zlarini turkistonliklar deb atardi. Til, turmush tarzi, mahalliy qadriyatlar va o‘ziga xosliklarda xilma-xillik mavjud bo‘lsa-da, hech kim etnik millatchilikka berilmagan.

Ammo Sobiq Ittifoq davrida mintaqada bo‘linish yuz berdi. Har bir xalqqa alohida hukumat, suverenitet berilishi sabab hudud izolyatsiyaga uchradi, — deydi siyosatshunos.

Markaziy Osiyo mintaqasi davlatlari tarix va kelajak umumiyligini anglashi kerak. Shundan keyingina integratsiya haqiqiy hamda barqaror bo‘ladi. Faqat umumiy taqdirni anglash orqali globallashuv bosimiga qarshi tura olamiz, — deya so‘zlarini davom ettiradi Kamoliddin Rabbimov.

Hozir Markaziy Osiyo mintaqasi uchun yangi davr kirib kelmoqda. Ayni damda jahondagi eng yirik urush postsovet hududida (Ukraina va Rossiya o‘rtasida — tahr.) bo‘lib o‘tmoqda. Avvaliga bu urush ko‘pchilikni qo‘rqitdi. Ammo hozirga kelib bu voqea Markaziy Osiyo mintaqasining geosiyosiy jihatdan mustaqil bo‘lishida tarixiy bonusga aylanayotganini ko‘rish mumkin, — deya fikrlarini izohladi u.