“Daryo” kolumnisti, huquqshunos Saidali Muxtoraliyev 10-noyabr kunidan kuchga kirgan “Davlat fuqarolik xizmati to‘g‘risida”gi qonun bo‘yicha davlat fuqaroligi xizmatchisi lavozimiga ishga joylashish mavzusi bo‘yicha tushuntirish berdi.
Qonunda davlat fuqaroligi xizmatiga, lavozimiga ishga kirish uchun ma’lum bir cheklovlar o‘rnatilyapti. Albatta, boshqa sohalarga nisbatan amaldagi Mehnat kodeksida yoki yangi tahrirda qabul qilingan Mehnat kodeksidagi qoidalarda O‘zbekiston va chet el fuqarolariga hamda fuqaroligi bo‘lmagan shaxslarga birdek amal qilishi ko‘rsatilgan.
Umumiy toifa vazifalariga, lavozimlariga ishga kirish uchun, albatta, O‘zbekiston fuqarosi bo‘lish shart emas. Fuqaroligi bo‘lmagan shaxslar ham, chet el fuqarolari ham cheklovsiz ishga kirishi mumkin, cheklov yo‘q.
“Davlat fuqaroligi to‘g‘risida”gi qonunda esa aytilyaptiki, davlat fuqarolik xizmatchilari lavozimlariga faqat O‘zbekiston fuqarolari ishga qabul qilinishi mumkin. Shu bilan birga, davlat tilini bilgan O‘zbekiston fuqarolari ishga qabul qilinishi mumkinligi ko‘rsatilyapti. To‘g‘ri, chet el fuqarolarini ishga yollash masalasi bo‘yicha alohida qonunchilik hujjatlarida belgilangan talablar, tartiblar ishlaydi. Lekin aniq ayta olaman, davlat fuqaroligi xizmatchilari lavozimiga qo‘yiladigan birinchi talab — O‘zbekiston fuqarosi bo‘lish hamda davlat tilini yaxshi bilish.
Ikkinchi muhim masala davlat fuqarolik xizmatchilari lavozimiga qabul qilish uchun qo‘yiladigan cheklovlar:
- 18 yoshga to‘lmagan fuqarolar ishga qabul qilinishi;
- sud hukmi bilan davlat fuqaroligi xizmati lavozimida ishlashdan mahrum qilingan shaxslar;
- korrupsiyaga oid huquqbuzarlik sodir qilgan shaxslar ham davlat fuqarolik xizmatchilari lavozimlariga, u rahbarlik lavozimi bo‘ladimi, oddiy mutaxassislik lavozimlari bo‘ladimi, ishga qabul qilinishi mumkin emas.
Davlat fuqarolik xizmatchisi lavozimiga ishga kirish masalasi to‘laqonli shaffof tanlov tizimi orqali amalga oshiriladi. Hozirda ham bizda bu tizim bor. Ko‘pchiligimiz bilamiz, vazirliklar, davlat qo‘mitalari, davlat idoralarida Davlat xizmatini rivojlantirish agentligi orqali yo‘lga qo‘yilgan maxsus tanlov tizimi bor. Bu tizim yanada takomillashadi. Boisi davlat fuqaroligi xizmatchisi lavozimiga ishga kirish uchun maxsus innovatsion tizimni yaxshi yo‘lga qo‘ygan tanlovdan o‘tishga to‘g‘ri keladi. Ushbu tanlovdan ijobiy natijalar bilan o‘tgandan keyin bu lavozimga ishga kirish mumkin bo‘ladi.
Ayni paytda qonunning ijrosi bo‘yicha qabul qilinadigan qonunosti hujjatlardan biri e’lon qilinishi kutilyapti. Davlat fuqaroligi tizimi sohasida tanlov o‘tkazish bo‘yicha maxsus nizom, maxsus tartib O‘zbekiston prezidenti tomonidan tasdiqlanadi. Albatta, bu nizomda o‘sha tanlovda ishtirok etish uchun fuqarolik, malaka darajasi va zaxira talablari bilan bog‘liq jihatlar, maxsus normalar ko‘zda tutiladi. Bu hujjat ham shu kunlarda qabul qilinishi, kuchga kirishi kutilyapti.
Izoh (0)