Har bir klub mavsumda kamida 34 ta o‘yin o‘tkazadi. 2023-yilgi mavsumda Superliga formatida o‘zgarish yuz berishi mumkin

Futbol bo‘yicha O‘zbekiston Superligasining formati 2023-yilgi mavsumda o‘zgarishi mumkin. Bu haqda PFL ma’lum qildi.

PFL bayonotida qayd etilishicha, Superliga bosh murabbiylari ishtirokida 19-sentabr kuni o‘tkazilgan yig‘ilishda o‘yinlar sonini oshirish masalasi ko‘tarilgan va o‘sha majlisda chempionat ishtirokchilari sonini 16 taga yetkazish taklifi ham berilgan.

Biroq PFL ushbu holatda sport prinsiplari buzilishini qayd etib, ishtirokchilar sonini oshirmasdan ham o‘yinlar sonini ko‘paytirish borasida o‘z ishlanmasini taqdim etdi.

Yangi formatga ko‘ra, har bir jamoa uchun o‘yinlar soni 26 tadan 31 taga ko‘payadi. 2023-yilda Superliganing 14 jamoasi 26 ta tur o‘tkazadi. Shundan keyin 13 va 14-o‘rinni egallagan jamoalar Pro-Ligaga ravona bo‘ladi.

Qolgan 12 jamoa esa teng ikki qismga bo‘linadi. Birinchi oltilik chempionlik uchun kurashni davom ettiradi va har bir jamoa yana beshtadan o‘yin o‘tkazadi. Qur’ada 26-turdan keyingi turnir jadvalida dastlabki uchta o‘rinni egallagan jamoa 1-savatdan joy oladi — ular o‘yinlarning uchtasini o‘z maydonida o‘tkazadi. Bu holatda jamoalar shu vaqtga qadar to‘plagan ochkolari o‘z qiymatini saqlab qoladi. Shu tariqa musobaqa jadvalida yuqori o‘rinni egallagan jamoalar mavsum davomida ikki marta emas, uch bor o‘zaro to‘qnash keladi.

7—12-o‘rindagi jamoalar ham xuddi shu tariqa savatlarga ajratiladi. 31-turdan keyin 10—12-o‘rinni egallagan jamoalar Superliga kelasi mavsumiga o‘tish o‘yinida ishtirok etadi. Ushbu uch jamoa safiga Pro-Ligada uchinchi o‘rinni qo‘lga kiritgan jamoa qo‘shiladi. Pro-Liganing uchinchi jamoasi Superligada 11 yoki 12-o‘rinni egallagan jamoa bilan o‘z uyida to‘qnash keladi. Superliganing 10-o‘rindagi jamoasi ham o‘z maydonida o‘ynaydi. Ushbu o‘yinlarda mag‘lub bo‘lgan jamoalar neytral maydonda o‘zaro to‘qnash keladi va yutqazgan klub Pro-Ligaga ravona bo‘ladi.

Bu format orqali Superligadagi o‘yinlar soni 182 tadan 212 taga yetadi. Pley-off esa bitta emas, uchta o‘yindan iborat bo‘ladi.

Shu tariqa O‘zbekiston Kubogi guruh bosqichidagi ikkita o‘yinni inobatga olsa jamoalar mavsum davomida kamida 34 ta, o‘rtacha 37 ta va ko‘pi bilan 39 ta rasmiy o‘yin o‘tkazadi.