Niderlandiya terma jamoasi JCH—2022 1-turida Senegal ustidan 2:0 hisobidagi g‘alabani qo‘lga kiritdi.
Niderlandiya mundiallar guruh bosqichida ketma-ket yetti o‘yindan beri g‘alaba qozonib kelmoqda. 2010 va 2014-yilgi musobaqalar guruh bosqichidagi barcha o‘yinlar g‘alaba bilan yakunlangan. JCH—2018 da esa jamoa ishtirok etmagan.
“Uchar gollandlar” ustozi Lui van Gal Niderlandiya boshqaruvida 38-g‘alabasini qo‘lga kiritdi. 71 yoshli mutaxassis bu borada Dik Advokatni (37 g‘alaba) ortda qoldirib, rekordchiga aylandi.
Van Gal Niderlandiyani uchinchi marta boshqarmoqda. Avvalroq u 2000-2001 va 2012—2014-yillar davomida terma jamoaga ustozlik qilgan. Hozirgi davri esa 2021-yilning avgustida boshlangandi.
Qayd etish kerak, JCH—2022 dan keyin van Gal terma jamoa boshqaruvini tark etadi. Uning o‘rnini 2023-yil yanvaridan boshlab Ronald Kuman egallaydi.
Avvalroq Lui saraton bilan og‘rigani va uni yengib o‘tgani haqida ma’lum qilgandi.
Izoh (0)