Футбол бўйича Ўзбекистон Суперлигасининг формати 2023 йилги мавсумда ўзгариши мумкин. Бу ҳақда ПФЛ маълум қилди.
ПФЛ баёнотида қайд этилишича, Суперлига бош мураббийлари иштирокида 19 сентябрь куни ўтказилган йиғилишда ўйинлар сонини ошириш масаласи кўтарилган ва ўша мажлисда чемпионат иштирокчилари сонини 16 тага етказиш таклифи ҳам берилган.
Бироқ ПФЛ ушбу ҳолатда спорт принциплари бузилишини қайд этиб, иштирокчилар сонини оширмасдан ҳам ўйинлар сонини кўпайтириш борасида ўз ишланмасини тақдим этди.
Янги форматга кўра, ҳар бир жамоа учун ўйинлар сони 26 тадан 31 тага кўпаяди. 2023 йилда Суперлиганинг 14 жамоаси 26 та тур ўтказади. Шундан кейин 13 ва 14-ўринни эгаллаган жамоалар Про-Лигага равона бўлади.
Қолган 12 жамоа эса тенг икки қисмга бўлинади. Биринчи олтилик чемпионлик учун курашни давом эттиради ва ҳар бир жамоа яна бештадан ўйин ўтказади. Қуръада 26-турдан кейинги турнир жадвалида дастлабки учта ўринни эгаллаган жамоа 1-саватдан жой олади — улар ўйинларнинг учтасини ўз майдонида ўтказади. Бу ҳолатда жамоалар шу вақтга қадар тўплаган очколари ўз қийматини сақлаб қолади. Шу тариқа мусобақа жадвалида юқори ўринни эгаллаган жамоалар мавсум давомида икки марта эмас, уч бор ўзаро тўқнаш келади.
7—12-ўриндаги жамоалар ҳам худди шу тариқа саватларга ажратилади. 31-турдан кейин 10—12-ўринни эгаллаган жамоалар Суперлига келаси мавсумига ўтиш ўйинида иштирок этади. Ушбу уч жамоа сафига Про-Лигада учинчи ўринни қўлга киритган жамоа қўшилади. Про-Лиганинг учинчи жамоаси Суперлигада 11 ёки 12-ўринни эгаллаган жамоа билан ўз уйида тўқнаш келади. Суперлиганинг 10-ўриндаги жамоаси ҳам ўз майдонида ўйнайди. Ушбу ўйинларда мағлуб бўлган жамоалар нейтрал майдонда ўзаро тўқнаш келади ва ютқазган клуб Про-Лигага равона бўлади.
Бу формат орқали Суперлигадаги ўйинлар сони 182 тадан 212 тага етади. Плей-офф эса битта эмас, учта ўйиндан иборат бўлади.
Шу тариқа Ўзбекистон Кубоги гуруҳ босқичидаги иккита ўйинни инобатга олса жамоалар мавсум давомида камида 34 та, ўртача 37 та ва кўпи билан 39 та расмий ўйин ўтказади.
Изоҳ (0)