Srechko Katanes: “Meni chiroyli fint, qoyilmaqom uzatmalar unchalik qiziqtirmaydi, 90 daqiqa yuguradigan o‘yinchilar kerak”

O‘zbekiston milliy terma jamoasi bosh murabbiyi Sresko Katanes Rossiyaga qarshi kechgan o‘yindagi durangdan (0:0) keyin o‘z fikrlari bilan o‘rtoqlashdi.

Shomurodov chiqib ketganidan keyin o‘yin sustlashgani haqida

Agar dunyoning eng yaxshi terma jamoalariga qaraydigan bo‘lsak, ular ham bir kuchli futbolchiga bog‘lanib qolgan. Benzemani nazarda tutyapman. Bu muammo faqat bizda emas.

Hujum chizig‘imizda Eldordan tashqari boshqa yaxshi forvardlar bor, misol uchun Bobur Abduxoliqov kelajakda bizga yordam berishi mumkin. Aslida bir himoyachini zaxiraga olib, ikki hujumchini maydonga tushirmoqchi edim. Biroq rossiyaliklar o‘yin nazoratini qo‘lga oldi, shu sababli tavakkal qilishni istamadim.

Shu bilan birga hujum chizig‘ini kuchaytira oladigan Jaloliddin Masharipov, Otabek Shukurov, Odil Hamrobekov bor. Ularga biroz tajriba kerak.

Aziz G‘aniyev va Sardor Rashidovning o‘yinlarini kuzatayotgani borasida

Albatta, barcha o‘yinchilarni kuzatib boraman. Ularni chaqirish-chaqirmasligim ular o‘ynayotgan chempionatga ham bog‘liq. Bilasizki, bizda jismoniy tarafdan muammolar bor. Tarkib yig‘ilgach, 1-2 ta mashg‘ulotdan so‘ng o‘yinga tushyapmiz, bu yetarli emas. Futbolchilardan yaxshi tempa harakat qilishi talab etiladi.

BAA va Qatar chempionatlari tempini juda yuqori deya olmayman, shu bois menga 90 daqiqa davomida yuguradigan futbolchilar kerak. Meni chiroyli fintlar, qoyilmaqom paslar unchalik qiziqtirmaydi. Menga birinchi navbatda gol urib, 90 daqiqa o‘ynay oladigan futbolchilar kerak. Shu sababdan, termaga chaqirishda avvalo yoshiga e’tibor beraman. Shuningdek, ularning statistik ma’lumotlari asosida jamoaga jalb qilaman.

Hojimat Erkinov ham yosh o‘yinchi edi. Lekin u ko‘z oldimizda qanday o‘sganini ko‘rdingiz. Xuddi shu narsani boshqa yosh o‘yinchilarga ham maslahat bergan bo‘lardim. Barchasi ularning o‘ziga bog‘liq. Agar ular yaxshi o‘ynab tursa, ularni terma jamoaga chaqiraman. U 16-17 yosh bo‘ladimi yoki 30 yosh, tarkibga chaqiraman.

Yosh o‘yinchilarga imkon bergani haqida

Yosh futbolchilar o‘zini yaxshi tomonlama ko‘rsatdi. Ilk o‘yin hissiyotlar va hayajonga boy bo‘ladi. Shuni inobatga olgan holda ularga yaxshi baho bergan bo‘lardim. Jiyanovni almashtirishim oldindan o‘ylangan reja edi, ya’ni boshqa o‘yinchilarga ham imkon berishim kerak edi.

Farrux Sayfiyev o‘zi uchun noqulay bo‘lgan o‘ng qanotda o‘ynagani borasida

Sayfiyev chap qanot himoyachisi. Lekin o‘ng qanotda muammo borligi sababli uni shu yerga o‘tkazishga majbur bo‘ldim. Bu o‘rtoqlik o‘yini bo‘lgani uchun tavakkal qilishdan qo‘rqqanim yo‘q. Agar Masharipov salomat bo‘lsa, Farrux ikkalasi chap qanotda faollikni oshiradi. Ular ko‘p yillar birga o‘ynagan.

Srechko Katanes, O‘zbekiston terma jamoasi bosh murabbiyi