Сречко Катанец: «Мени чиройли финт, қойилмақом узатмалар унчалик қизиқтирмайди, 90 дақиқа югурадиган ўйинчилар керак»

Ўзбекистон миллий терма жамоаси бош мураббийи Среско Катанец Россияга қарши кечган ўйиндаги дурангдан (0:0) кейин ўз фикрлари билан ўртоқлашди.

Шомуродов чиқиб кетганидан кейин ўйин сустлашгани ҳақида

Агар дунёнинг энг яхши терма жамоаларига қарайдиган бўлсак, улар ҳам бир кучли футболчига боғланиб қолган. Бенземани назарда тутяпман. Бу муаммо фақат бизда эмас.

Ҳужум чизиғимизда Элдордан ташқари бошқа яхши форвардлар бор, мисол учун Бобур Абдухолиқов келажакда бизга ёрдам бериши мумкин. Аслида бир ҳимоячини захирага олиб, икки ҳужумчини майдонга туширмоқчи эдим. Бироқ россияликлар ўйин назоратини қўлга олди, шу сабабли таваккал қилишни истамадим.

Шу билан бирга ҳужум чизиғини кучайтира оладиган Жалолиддин Машарипов, Отабек Шукуров, Одил Ҳамробеков бор. Уларга бироз тажриба керак.

Азиз Ғаниев ва Сардор Рашидовнинг ўйинларини кузатаётгани борасида

Албатта, барча ўйинчиларни кузатиб бораман. Уларни чақириш-чақирмаслигим улар ўйнаётган чемпионатга ҳам боғлиқ. Биласизки, бизда жисмоний тарафдан муаммолар бор. Таркиб йиғилгач, 1-2 та машғулотдан сўнг ўйинга тушяпмиз, бу етарли эмас. Футболчилардан яхши темпа ҳаракат қилиши талаб этилади.

БАА ва Қатар чемпионатлари темпини жуда юқори дея олмайман, шу боис менга 90 дақиқа давомида югурадиган футболчилар керак. Мени чиройли финтлар, қойилмақом паслар унчалик қизиқтирмайди. Менга биринчи навбатда гол уриб, 90 дақиқа ўйнай оладиган футболчилар керак. Шу сабабдан, термага чақиришда аввало ёшига эътибор бераман. Шунингдек, уларнинг статистик маълумотлари асосида жамоага жалб қиламан.

Ҳожимат Эркинов ҳам ёш ўйинчи эди. Лекин у кўз олдимизда қандай ўсганини кўрдингиз. Худди шу нарсани бошқа ёш ўйинчиларга ҳам маслаҳат берган бўлардим. Барчаси уларнинг ўзига боғлиқ. Агар улар яхши ўйнаб турса, уларни терма жамоага чақираман. У 16-17 ёш бўладими ёки 30 ёш, таркибга чақираман.

Ёш ўйинчиларга имкон бергани ҳақида

Ёш футболчилар ўзини яхши томонлама кўрсатди. Илк ўйин ҳиссиётлар ва ҳаяжонга бой бўлади. Шуни инобатга олган ҳолда уларга яхши баҳо берган бўлардим. Жияновни алмаштиришим олдиндан ўйланган режа эди, яъни бошқа ўйинчиларга ҳам имкон беришим керак эди.

Фаррух Сайфиев ўзи учун ноқулай бўлган ўнг қанотда ўйнагани борасида

Сайфиев чап қанот ҳимоячиси. Лекин ўнг қанотда муаммо борлиги сабабли уни шу ерга ўтказишга мажбур бўлдим. Бу ўртоқлик ўйини бўлгани учун таваккал қилишдан қўрққаним йўқ. Агар Машарипов саломат бўлса, Фаррух иккаласи чап қанотда фаолликни оширади. Улар кўп йиллар бирга ўйнаган.

Сречко Катанец, Ўзбекистон терма жамоаси бош мураббийи