Rossiyaning Rostov-na-Donu shahri sobiq politsiya mayori, xotinini o‘ldirish va qaynotasini o‘ldirishga urinishda ayblanib 15 yilga qamalgan Sergey Kadatskiy Lugansk viloyatidagi janglarda halok bo‘ldi. Bu haqda “1rnd.ru” portali xabar berdi.
Portal ma’lumotlariga ko‘ra, bu odam vafotidan keyin “Jasorat uchun” medali bilan taqdirlangan: “U jang maydonida mardlik va jasorat ko‘rsatib, qahramonlarcha halok bo‘ldi”, —deyiladi o‘zini o‘zi respublika deb e’lon qilgan LXR rahbari Leonid Pasechnik imzolagan farmonda.
2018-yilda Sergey Kadatskiy bir yil avval sodir etgan qotilligi uchun qamoqqa hukm qilingan edi. Tergov ma’lumotlariga ko‘ra, u mast holda xotini va qaynotasi o‘tirgan mashinaga qarata o‘q uzgan. Ayol voqea joyida vafot etgan, erkak qutqarib qolingan. Shundan so‘ng OAV voqeaga oilaviy janjal sabab bo‘lganini yozdi.
Sergey Kadatskiy — Ukrainadagi jangovar harakatlardagi ishtiroki uchun mukofotlangan birinchi rossiyalik mahbus emas. Avvalroq xuddi shunday medal bilan Podmoskvye uyushgan jinoiy guruhi rahbari, qotillik, talonchilik, odam o‘g‘irlash, tovlamachilik va boshqa jinoyatlar uchun 25 yilga hukm qilingan Ivan Neparatov vafotidan keyin taqdirlangan edi. Tegishli farmonni Rossiya prezidenti Vladimir Putin imzolagan.
2022-yilning yozida “Vagner” xususiy harbiy kompaniyasi rossiyalik mahbuslarni Ukrainadagi urushda qatnashish uchun yollayotgani ma’lum bo‘ldi. “Rus sidyashaya” inson huquqlari loyihasi rahbari Olga Romanova sentabr oyida “Vagner”ga 11 ming mahbus qo‘shilgan bo‘lishi mumkinligini aytdi. Keyinchalik “Mediazona” sentabr—oktabr oylarida Rossiyaning axloq tuzatish koloniyalarida mahbuslar soni 23 ming kishiga kamaygani, bu ularning urushga yollanishi bilan bog‘liqligi haqida yozdi.
The Insider nashri ma’lumotlariga ko‘ra, oktabr oyi o‘rtalariga qadar Ukrainada 500 dan ortiq mahbus halok bo‘lgan. BBC rus xizmati Mediazona bilan birgalikda ulardan atigi 47 nafarining o‘limini tasdiqlashga muvaffaq bo‘ldi. Shu bilan birga, Olga Romanovaning ta’kidlashicha, “Vagner” jangchilari 40 ga yaqin mahbusni qochib ketish, taslim bo‘lishga urinish, talonchilik, spirtli ichimliklar yoki giyohvand moddalarni iste’mol qilish va “jinsiy aloqa” uchun qatl qilgan.
Izoh (0)