AQSH Ukrainaga 20 milliard dollardan ortiq harbiy yordam ko‘rsatdi va qancha vaqt kerak bo‘lsa, shuncha vaqt Kiyevni qo‘llab-quvvatlashda davom etadi. Bu haqda AQSH mudofaa vaziri Lloyd Ostin Indoneziyada o‘tkazilgan matbuot anjumanida ma’lum qildi.
“Hozirgi vaqtgacha Ukrainaga 20 milliard dollardan ortiq yordam berdik. Bayonotlarimizni eshitgansiz: Biz Ukrainani qancha kerak bo‘lsa, shuncha vaqt qo‘llab-quvvatlashda davom etamiz”, — dedi Pentagon rahbari.
Ostinning so‘zlariga ko‘ra, NATO va boshqa davlatlar Ukrainaga, jumladan, G‘arb davlatlarining aloqa guruhi vositachiligida faol yordam bermoqda.
U Ukrainani qo‘llab-quvvatlash — xalqaro vazifa ekanini ta’kidladi. Uning so‘zlariga ko‘ra, Vashington Kiyev unga ko‘rsatilayotgan harbiy yordamdan foydalanayotganini va Ukraina Qurolli kuchlari jang maydonida “muvaffaqiyat ko‘rsatayotganini” ko‘rib turibdi.
Avgust oyida AQSH Davlat kotibi Entoni Blinken Jo Bayden prezidentligi davrida AQSHning Ukrainaga bergan harbiy yordami miqdori 10 milliard dollardan oshganini aytgandi.
18-noyabr kuni respublikachilar AQSH Ukrainaga yordam uchun yuborgan “har bir dollar”ning tekshirilishini talab qilib chiqdi.
Respublikachilar partiyasi vakili Marjori Teylor Grin Ukraina Amerikaning 51-shtati emasligini ta’kidladi. Uni qo‘llab-quvvatlash uchun yuborilgan amerikalik soliq to‘lovchilarning pullarini esa, diplomatning so‘zlariga ko‘ra, AQSH janubiy chegarasi himoyasini kuchaytirishga sarflash mumkin edi.
Izoh (0)