Россиянинг Ростов-на-Дону шаҳри собиқ полиция майори, хотинини ўлдириш ва қайнотасини ўлдиришга уринишда айбланиб 15 йилга қамалган Сергей Кадацкий Луганск вилоятидаги жангларда ҳалок бўлди. Бу ҳақда «1rnd.ru» портали хабар берди.
Портал маълумотларига кўра, бу одам вафотидан кейин «Жасорат учун» медали билан тақдирланган: «У жанг майдонида мардлик ва жасорат кўрсатиб, қаҳрамонларча ҳалок бўлди», —дейилади ўзини ўзи республика деб эълон қилган ЛХР раҳбари Леонид Пасечник имзолаган фармонда.
2018 йилда Сергей Кадацкий бир йил аввал содир этган қотиллиги учун қамоққа ҳукм қилинган эди. Тергов маълумотларига кўра, у маст ҳолда хотини ва қайнотаси ўтирган машинага қарата ўқ узган. Аёл воқеа жойида вафот этган, эркак қутқариб қолинган. Шундан сўнг ОАВ воқеага оилавий жанжал сабаб бўлганини ёзди.
Сергей Кадацкий — Украинадаги жанговар ҳаракатлардаги иштироки учун мукофотланган биринчи россиялик маҳбус эмас. Аввалроқ худди шундай медал билан Подмоскве уюшган жиноий гуруҳи раҳбари, қотиллик, талончилик, одам ўғирлаш, товламачилик ва бошқа жиноятлар учун 25 йилга ҳукм қилинган Иван Непаратов вафотидан кейин тақдирланган эди. Тегишли фармонни Россия президенти Владимир Путин имзолаган.
2022 йилнинг ёзида «Вагнер» хусусий ҳарбий компанияси россиялик маҳбусларни Украинадаги урушда қатнашиш учун ёллаётгани маълум бўлди. «Рус сидяшая» инсон ҳуқуқлари лойиҳаси раҳбари Олга Романова сентябрь ойида «Вагнер»га 11 минг маҳбус қўшилган бўлиши мумкинлигини айтди. Кейинчалик «Медиазона» сентябрь—октябрь ойларида Россиянинг ахлоқ тузатиш колонияларида маҳбуслар сони 23 минг кишига камайгани, бу уларнинг урушга ёлланиши билан боғлиқлиги ҳақида ёзди.
The Insider нашри маълумотларига кўра, октябрь ойи ўрталарига қадар Украинада 500 дан ортиқ маҳбус ҳалок бўлган. BBC рус хизмати Медиазона билан биргаликда улардан атиги 47 нафарининг ўлимини тасдиқлашга муваффақ бўлди. Шу билан бирга, Олга Романованинг таъкидлашича, «Вагнер» жангчилари 40 га яқин маҳбусни қочиб кетиш, таслим бўлишга уриниш, талончилик, спиртли ичимликлар ёки гиёҳванд моддаларни истеъмол қилиш ва «жинсий алоқа» учун қатл қилган.
Изоҳ (0)