Жиззах вилояти Зарбдор туманида истеъмолга яроқсиз гўшт маҳсулотларининг сотувга қўйилиши олди олинди. Бу ҳақда Иқтисодий жиноятларга қарши курашиш департаменти ахборот хизмати хабар берди.
Бош прокуратура ҳузуридаги департаментнинг Зарбдор тумани бўлими томонидан ИИБ ҳамда туман Ветеринария ва чорвачиликни ривожлантириш бўлими ходимлари билан ҳамкорликда тезкор тадбир ўтказилган. Унда фуқаро З.П. фуқаро Д.Д.га Жиззах шаҳри «Тошлоқ» МФЙ ҳудудидаги хонадонида истеъмолчилар ҳаёти ва соғлиги хавфсизлиги талабларига жавоб бермайдиган 201 кг йирик шохли мол гўштини 8,6 млн сўмга сотишга келишгани аниқланган. Шундан 6 млн сўмни олган вақтида ушланиб, унинг хонадони кўздан кечирилганда бирламчи ветеринария ҳужжатларига эга бўлмаган жами 73 дона қорамол туёғи ва 61,3 кг истеъмолга яроқсиз гўшт маҳсулотлари борлиги аниқланиб, ашёвий далил сифатида олинган.
Мазкур ҳолат юзасидан Жиноят кодексининг 186-моддаси (хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш) билан жиноят иши қўзғатилиб, тергов ҳаракатлари ўтказилмоқда.
Мавзуга доир:
Изоҳ (0)