O‘zbekiston tashqi ishlar vaziri Vladimir Norov 17-noyabr kuni tojikistonlik hamkasbi Sirojiddin Muxriddin bilan Samarqandda uchrashuv o‘tkazdi. Bu haqda TIV axborot xizmati xabar qildi.
Qayd etilishicha, O‘zbekiston—Tojikiston do‘stlik va yaxshi qo‘shnichilik munosabatlari, turli sohalardagi strategik sheriklik va ittifoqchilikning dolzarb masalalari muhokama qilingan. Ikki mamlakat rahbarlarining birgalikdagi sa’y-harakatlari tufayli so‘nggi yillarda ikki tomonlama hamkorlikni rivojlantirishda yutuqlarga erishilgani ta’kidlangan.
Tomonlarning oliy darajadagi kelishuvlarni har tomonlama amalga oshirish bo‘yicha sa’y-harakatlarni muvofiqlashtirishga tayyorligi ma’lum qilingan.
Parlamentlar, hukumatlar va tarmoq vazirliklari orqali faol muloqot o‘tkazish muhimligi ta’kidlangan.
Savdo-iqtisodiy hamkorlikni kengaytirish, tovar ayirboshlash ko‘rsatkichlarini oshirish, ikki mamlakat mintaqalarining to‘g‘ridan-to‘g‘ri aloqalarini qo‘llab-quvvatlash, energetika, sanoat, qishloq xo‘jaligi va boshqa sohalarda kooperatsiya loyihalarini amalga oshirish bo‘yicha takliflar, shu jumladan, O‘zbekiston—Tojikiston investitsiya kompaniyasi mablag‘lari hisobidan ko‘rib chiqilgan.
Suv-energetika resurslaridan oqilona foydalanish va barqaror transport-kommunikatsiya aloqalarini rivojlantirish bo‘yicha hamkorlikni davom ettirishga kelishib olingan.
Xalqaro institutlar doirasidagi tomonlarning o‘zaro hamkorligi, shuningdek, mintaqaviy siyosatning ayrim masalalari yuzasidan fikr almashilgan.
Izoh (0)